7 красавіка ў базыліцы св. Яна на Латэране, якая з’яўляецца катэдрай Біскупа Рыма, адбыўся ўрачысты інгрэс папы Францішка на рымскую кафедру. У цырымоніі прынялі ўдзел тысячы жыхароў Вечнага Горада, кардыналы, біскупы і святары.

У нядзелю 7 красавіка перад інгрэсам на рымcкую кафедру, што адбыўся ў базыліцы св. Яна на Латэране, папа Францішак адкрыў табліцу з новай назвай плошчы перад базылікай. З гэтага часу яна будзе насіць імя благаслаўлёнага Яна Паўла ІІ.

У маі 2013 г. Святы Айцец Францішак наведае адну з рымскіх парафій. Аб гэтым сказаў кардынал Агасціно Валіні, Папскі вікарый для Рымскай дыяцэзіі. Іерарх таксама адзначыў, што ў чэрвені Пантыфік прыме ўдзел у штогадовым кангрэсе Рымскай дыяцэзіі, а ў верасні, на пачатку душпастырскага года, сустрэнецца з усімі святарамі Вечнага Горада.

6 красавіка Святы Айцец Францішак у тэлефоннай размове з губернатарам правінцыі Буэнас-Айрэса (Аргенціна) Даніэлем Сцыолі асабіста даведаўся пра сітуацыю ў сувязі з паводкай, выкліканай вялікімі дажджамі, у архідыяцэзіі, якую ўзначальваў раней. Папа праз пасрэдніцтва губернатара запэўніў аргенцінцаў у сваёй духоўнай блізкасці.

15 інвалідаў прымуць удзел у інгрэсе папы Францішка на рымскую кафедру, які адбудзецца 7 красавіка ў базыліцы св. Яна на Латэране. Яны прадставяць ўсю супольнасць людзей з абмежаванымі магчымасцямі Вечнага горада.

9 красавіка папа Францішак сустрэнецца з Генеральным сакратаром ААН Пан Гі Мунам. 6 красавіка інфармацыю пра сустрэчу пацвердзіла Прэс-служба Апостальскай Сталіцы.

5 красавіка Святы Айцец Францішак прыняў на аўдыенцыях прэфекта Кангрэгацыі Веравучэння арцыбіскупа Герхарда Мюлера і прэфекта Кангрэгацыі па справах Усходніх Касцёлаў кардынала Леанарда Сандры. Папа зааахвоціў арцыбіскупа Мюлера да рашучых дзеянняў cупраць сексуальных злачынстваў.

Перад сваім інгрэсам на рымскую кафедру, які адбудзецца 7 красавіка ў базыліцы св. Яна на Латэране, Святы Айцец Францішак адкрые дошку, на якой будзе змешчана новая назва плошчы перад гэтай базылікай. Аб гэтым паведаміла Прэфектура Папскага дому.

Толькі ў Хрысце збаўленне, — падкрэсліў Святы Айцец Францішак падчас літургіі, якую ён цэлебраваў 5 красавіка ў Доме св. Марты ў Ватыкане. Разважаючы над літургічнымі чытаннямі гэтага дня, Папа адзначыў, што толькі ў імя Езуса мы збаўлены.

«Бог любіць нас. Мы не павінны баяцца любіць Яго. Вера вызнаецца вуснамі і сэрцам, словам і любоўю», — так гучыць новы запіс у профілі папы Францішка ў «Твітэры».

Уражанне ад сустрэчы з Езусам — да гэтай тэмы звярнуўся ў гаміліі падчас Імшы 4 красавіка ў капліцы Дома св. Марты папа Францішак. Святы Айцец нагадаў, што літургічныя чытанні гэтага дня кажуць пра ўражанне натоўпу аздараўленнем, здзейсненым ад імя Хрыста, і ўражанне вучняў аб’яўленнем паміж імі ўваскрослага Езуса.

Папа Францішак запэўніў у малітоўнай блізкасці пацярпелых ад паводкі аргенцінцаў. Паводка, выкліканая праліўнымі дажджамі, прывяла да смерці некалькіх дзясяткаў, а да вымушанай эвакуацыі — некалькіх тысяч чалавек.

Яшчэ ў бытнасць кардыналам папа Францішак прызнаўся, што дзякуючы сведчанню Яна Паўла ІІ штодзень моліцца ўсе таямніцы Ружанца. Аб гэтым сённяшні Пантыфік казаў у размове з італьянскім выданнем «30 Giorni».

На агульную аўдыенцыю з папам Францішкам 3 красавіка прыбылі каля 10 тысяч пілігрымаў з архідыяцэзіі Мілана (Італія) на чале са сваім Мітрапалітам кардыналам Анджэла Скола. Большасць пілігрымаў склала моладзь.

Італьянцаў і аргенцінцаў яднаюць духоўныя і сямейныя сувязі, культура і традыцыі. Аб гэтым, нагадваючы пра сваё італьянскае паходжанне, піша папа Францішак у лісце да Італьянска-аргенцінскага грамадска-культурнага таварыства «Ascia» у Італіі.

У Апостальскай Сталіцы стаў вядомы каляндар літургічных цэлебрацый, якія ўзначаліць Святы Айцец у красавіку і маі. 7 красавіка, у нядзелю Божай Міласэрнасці, у 17.30 адбудзецца інгрэс папы Францішка на кафедру Біскупа Рыма ў базыліцы св. Яна на Латэране.

2 красавіка ўвечары Святы Айцец Францішак здзейсніў візіт да месца спачывання бл. Яна Паўла II у восьмую гадавіну яго смерці. Святога Айца суправаджаў кардынал Анджэла Камастры, архіпрэзбітэр базылікі св. Пятра, і кс. прэлат Альфрэд Хуэрэб, асабісты сакратар Пантыфіка.

Простыя і зразумелыя жэсты папы Францішка вельмі нагадалі пра аднаго яго папярэдніка на Пасадзе св. Пятра. Ён таксама меў простае паходжанне. Вёў сціплы лад жыцця. Славіўся асабістай святасцю, карыстаўся вялікай павагай і любоўю людзей.

У велікодны панядзелак, 1 красавіка, папа Францішак патэлефанаваў арцыбіскупу Ларысу Франчэска Капавіле, былому асабістаму сакратару папы Яна ХХІІІ, каб павіншаваць іерарха з Вялікаднем, а таксама падзякаваць за рэкламныя плакаты, зробленыя да Года веры ў яго дыяцэзіі на поўначы Італіі.

Пра вялікую пашану сённяшняга Пантыфіка Францішка да Яна Паўла ІІ нагадвае Ватыканскае радыё ў 8-ю гадавіну смерці благаслаўлёнага Папы. У 1992 г. Ян Павел ІІ прызначыў кс. Берголіа біскупам, а ў 2001 г. уключыў яго ў Калегію кардыналаў.