7 і 8 красавіка ў нядзелю Божай Міласэрнасці і ва ўрачыстасць Звеставання Пана вернікі ва ўсіх касцёлах Беларусі змогуць далучыцца да «Духоўнага ўсынаўлення» — малітоўнай акцыі па абароне зачатага жыцця, якое знаходзіцца пад пагрозай знішчэння. У чым сутнасць гэтай акцыі, і хто можа прымаць у ёй удзел?

У тэалагічным значэнні слова «абяцанне» — гэта дадзенае Богу абяцанне, аб’ектам якога з’яўляецца вышэйшае дабро. У выпадку «духоўнага ўсынаўлення» аб’ект абяцанняў — гэта малітва за ненароджанае дзіця і яго бацькоў. Гэтае абяцанне павінна быць свядомым: той, хто гэтае абяцанне складае, павінен рабіць гэта паводле вольнага выбару. Абяцанне «духоўнага ўсынаўлення» з’яўляецца часовым, бо трывае 9 месяцаў (столькі ж, колькі дзіця знаходзіцца ва ўлонні маці).

Хто можа прымаць удзел у «духоўным усынаўленні»?

У «духоўным усынаўленні» можа ўдзельнічаць кожны, хто адчувае сябе здольным выканаць абяцанне, дадзенае Богу. Гэта старэйшыя асобы, хворыя, цярпенні якіх прыносяць добрыя плады. Да «Духоўнага ўсынаўлення» заахвочваюцца таксама дарослыя і моладзь. Калі моладзь прыме на сябе абавязак малітвы за ненароджаных дзяцей, то можна спадзявацца, што не дапусціць смерці ўласнага зачатага дзіцяці.

Больш падрабязную інфармацыю пра «Духоўнае ўсынаўленне» можна атрымаць у пробашча вашай парафіі.

 а. Пётр Фраштэнга OCD

Cакратар Рады па справах сям’і пры ККББ