Пілігрымка «Шляхам мучанікаў нашай зямлі» распачнецца ў Гродне ў касцёле Маці Божай Анёльскай (францішканскі) у 12.00.

Малітоўны шлях будзе прысвечаны ў гонар святароў і вернікаў Гродна і Ліпска. 

Завершыцца пілігрымка ля Навумавічаў (форт №2) святой Імшой у 19.00, падчас якой будуць маліцца ў інтэнцыі ахвяраў Другой сусветнай вайны, а таксама выпрошваць заступніцтва бл. Мар'яны Бярнацкай, якая разам з іншымі была замардаваная на Форце за Гродна.

Умовы ўдзелу ў пілігрымцы і святой Імшы на Форце № 2:

Пілігрымы збіраюцца ў 12.00 у францішканскім касцёле Гродна і пасля сумеснай малітвы ў арганізаванай групе выправяцца на Форт № 2. Пераход запланаваны каля  шпіталю хуткай дапамогі і праз вёску Адамавічы.

Пілігрымы  пажылога ўзросту збяруцца на прыпынку ля крамы Баторыя (плошча Савецкая) у 14.30 і гарадскім аўтобусам прыбудуць да парафіяльнага касцёла ў Адамавічах.

З-пад касцёла ў Адамавічах у 15.15 пілігрымы разам выправяцца на Форт № 2, праз вёскі Міцкавічы і Навумавічы.

Непаўнагадовыя пілігрымы павінны мець апекуноў.
Арганізатары просяць удзельнікаў пілігрымкі ўзяць у дарогу ежу (абед падчас пілігрымкі прадугледжаны не будзе), а таксама добры абутак для пясчанай дарогі. Падчас пілігрымкі і св. Імшы спатрэбіцца таксама дыванок.

Для тых, хто не зможа пайсці 15 ліпеня ў пілігрымку, будзе магчымасць праезду гарадскім аўтобусам на св. Імшу ў 19.00 на Форце № 2. Адпраўленне аўтобуса з прыпынка ля крамы Баторыя (плошча Савецкая) у 18.00.

Пасля заканчэння св. Імшы для пілігрымаў прадугледжаны гарадскі аўтобус да Гродна. Плата за праезд на аўтобусе з'яўляецца добраахвотнай ахвярай, якую  можна  будзе скласці ў скарбонку ў аўтобусе.

Пытанні па тэлефоне: +375 29 286 3178 (кс. Антоні  Грэмза)

(cath)