Распачаўся XV Міжнародны кангрэс каталіцкай дабрачыннай арганізацыі «Рэнавабіс» |
Беларусь |
02.09.2011 13:34 |
1 верасня 2011 г. у нямецкім Фрайзінгу распачаўся XV Міжнародны кангрэс каталіцкай дабрачыннай арганізацыі «Рэнавабіс». У форуме прымаюць удзел 19 біскупаў, шматлікія святары, кансэкраваныя асобы, прадстаўнікі розных дзяржаўных і недзяржаўных арганізацый. Прысутнічае і дэлегацыя з Беларусі на чале са сваімі іерархамі Мітрапалітам Тадэвушам Кандрусевічам, біскупам Віцебскім Уладзіславам Блінам, Апостальскім Візітатарам для грэка-католікаў у Беларусі архімандрытам Сяргеем Гаекам. Тэма кангрэса — «Сельская мясцовасць у часы зменаў. Выклікі ў Цэнтральнай і Усходняй Еўропе». Большасць выступленняў прысвечана праблемам эміграцыі насельніцтва з Усходняй і Цэнтральнай Еўропы ў высокаразвітыя краіны, праблемам урбанізацыі, якая вядзе да паслаблення рэлігійнага жыцця і нацыянальных традыцый у карэннага насельніцтва, закранаецца таксама праблема заняпаду сельскай гаспадаркі. На працягу форума прачытаюць даклады і правядуць круглыя сталы каля 20 экспертаў з розных краін Еўропы. На пачатку кангрэса, адзін з дакладчыкаў - біскуп Ежы Мазур (Польшча) падкрэсліў, што Касцёл, прапаведваючы Евангелле, адначасова імкнецца дапамагаць у вырашэнні сацыяльных праблем ва ўсходняй і цэнтральнай Еўропе. «Рэнавабіс» — каталіцкая дабрачынная арганізацыя, якая аказвае дапамогу краінам усходняй і цэнтральнай Еўропы, што найбольш пацярпелі ад атэістычнай сістэмы камунізму, у якіх былі разбураны рэлігійныя структуры, а хрысціянская супольнасць зведала пераслед за веру. Пры падтрымцы «Рэнавабіс» у Беларусі было рэалізавана шмат праектаў. Супрацоўніцтва працягваецца і на дадзеным этапе. |
Фотарэпартаж |