Вынікі сацыялагічнага даследавання далі зразумець, што верыць у Бога 63,5 працэнта апытаных жыхароў Беларусі, яшчэ 5 працэнтаў беларусаў верыць у звышнатуральныя сілы.
Пра гэта са спасылкай на Інфармацыйна-аналітычны цэнтр паведамляе БЕЛТА.
22 працэнты не змаглі адназначна вызначыць сваё стаўленне да веры, а 8,5 працэнта пазначылі сябе няверуючымі.
Абсалютная большасць апытаных адносіць сябе да дзвюх канфесій — праваслаўя (83 працэнты) і каталіцтва (9,5 працэнта). Да іншых рэлігійных напрамкаў сябе залічылі 2 працэнты рэспандэнтаў.
Як сведчаць адказы ўдзельнікаў апытання, якія атаясамліваюць сябе з прыналежнасцю да пэўнай рэлігійнай канфесіі, найбольш важным для веруючага чалавека з’яўляецца выкананне 10 запаведзяў (87 працэнтаў) і малітва (82 працэнты).
Актыўна вядуць сябе ў рэлігійным плане толькі 9 працэнтаў рэспандэнтаў, якія залічылі сябе да пэўнай рэлігіі: пастаянна прымаюць удзел у набажэнствах 6 працэнтаў, выконваюць усе абрады і прымаюць сакрамэнты — 3 працэнты апытаных.