У Малай зале Палаца Рэспублікі 2 верасня 2010 г. адбыўся дабрачынны канцэрт «БлагоДарю», які стаў выказам удзячнасці тым, хто аказвае дапамогу цяжкахворым дзецям. На канцэрце прысутнічаў Мітрапаліт Мінска-Магілёўскі арцыбіскуп Тадэвуш Кандрусевіч, які прамовіў прывітальнае слова і ўдзяліў благаслаўленне ўсім сабраным.

Ініцыятарамі мерапрыемства сталі Міжнародны дабрачынны фонд дапамогі дзецям «Шанс», рэлігійная місія «Карытас» Мінска-Магілёўскай архідыяцэзіі, Беларуская Праваслаўная Царква, Міжнароднае грамадскае аб'яднанне «Понимание», Міжканфесійная місія «Хрысціянскае сацыяльнае служэнне», іудзейскае і мусульманскае рэлігійныя аб’яднанні ў РБ.

Сярод гледачоў былі прысутныя пастаянныя ахвярадаўцы і валанцёры фонду «Шанс» і дабрачыннага каталіцкага таварыства «Карытас», урачы, прадстаўнікі выданняў, якія аказваюць пастаянную інфармацыйную падтрымку дабрачынным акцыям, члены Палаты прадстаўнікоў Нацыянальнага сходу РБ, а таксама тыя, хто прымае непасрэдны ўдзел у лёсе цяжкахворых дзяцей.

Сюжэт канцэрта стаў адлюстраваннем рэальных гісторый з жыцця падапечных фонду «Шанс» і Дзіцячага дабрачыннага сацыяльна-рэабілітацыйнага цэнтра «Карытас». Гэта гісторыі дзяцей, якія, дзякуючы дапамозе іншых, змаглі знайсці ў сабе сілы, каб пераадолець свае немачы і вярнуцца да паўнацэннага жыцця. Разам са сваімі бацькамі яны таксама прысутнічалі ў гэты дзень у зале Палаца Рэспублікі.

У канцэрце прынялі ўдзел вакальная группа «Камерата», Аляксандр Патліс, Ядвіга Паплаўская і Аляксандр Ціхановіч, Насця Піліпейка, Ларыса Грыбалёва, тэатр танца Аляксандра Межэннага, Дзіцячы тэатр «Рэвю», Патрыцыя, калектыў «Гузікі», хор «Аніма», струнны квартэт «Бланш».

На заканчэнне мерапрыемства валанцёры падарылі кожнаму гледачу маленькі званочак, а вядучы вечара — заслужаны артыст РБ Андрэй Душачкін — падвёў вынікі канцэрта такімі словамі: «Калі смяюцца дзеці, мы — дарослыя — адчуваем сябе шчаслівымі. Давайце зробім так, каб радасць не прападала. Няхай бадзёрым званочкам усё часцей гучыць бесклапотны дзіцячы смех». Пасля гэтых словаў увесь зал напоўніўся іскрыстым звонам, які абвясціў, што дабрачынны канцэрт адбудзецца і ў наступным годзе, каб расказаць пра новыя шчаслівыя гісторыі выздараўлення нашых дзяцей.