3 красавіка, у свята Божай Міласэрнасці, адбыўся Дзень «Caritas» Гродзенскай дыяцэзіі. Сёлета ён праходзіў у Астраўцы. Актыўны ўдзел у яго правядзенні прынялі валанцёры дабрачыннага каталіцкага таварыства «Caritas» у Гродне.
Увесь дзень валанцёры, нягледзячы на стомленасць, выкліканую раннім пад’ёмам і дарогай, з добрым настроем стаялі са скарбонкамі і распавядалі ўсім жадаючым пра валанцёрскія праекты «Caritas»-Гродна.
Таксама падчас кожнай святой Імшы можна было даведацца шмат пра дзейнасць «Caritas» у Гродне і ва ўсёй Беларусі. Варта адзначыць, што парафіяне праяўлялі вялікую ўвагу да дзейнасці гродзенскага «Caritas», з цікавасцю распытвалі пра валанцёрскія праекты і мерапрыемствы.
Дзень «Caritas» – ужо традыцыйнае мерапрыемства, дзякуючы якому ўсё больш вернікаў з розных гарадоў і парафій даведваюцца шмат новага пра дабрачынную дзейнасць, дапамогу, якую гэтая арганізацыя аказвае патрабуючым, а таксама аб валанцёрскім руху і дабрачынных акцыях «Caritas».