Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Сёстры назарэтанкі правялі ў Навагрудку рэкалекцыі для сем’яў
Беларусь - Гродзенская дыяцэзія
22.08.2012 16:31

У Навагрудку прайшлі рэкалекцыі для сем’яў, арганізаваныя сёстрамі назарэтанкамі. Рэкалекцыі адбываюцца ўжо трэці год. Рэгулярныя сустрэчы праходзяць кожны месяц у Гродне і Смаргоні, а духоўныя практыкаванні — 3–4 разы ў год у Навагрудку.

Удзельнікі гэтых духоўных практыкаванняў праходзяць фармацыю ў харызме Асацыяцыі Святой Сям’і з Назарэта, заснаванай благаслаўлёнай Францішкай Сядліскай разам з  Кангрэгацыяй Сясцёр Найсвяцейшай Сям’і з Назарэта (назарэтанкі).

Ідэяй заснавальніцы было распаўсюджанне назарэтанскай харызмы — Валадарства Божай любові — не толькі яе духоўнымі дочкамі законніцамі, але і свецкімі вернікамі.

Асаблівасцю сёлетніх рэкалекцый было прыняцце першых кандыдатаў у Асацыяцыю Святой Сям’і з Назарэта. Пасля абавязковай двухдзённай фармацыі кандыдаты (цэлыя сем’і, прадстаўнікі сем’яў і моладзь) падпісалі на саркафагу Благаслаўлёных сясцёр мучаніц дэкларацыі, пацвярджаючыя іх прыналежнасць да асацыяцыі, тым самым абяцаючы жыць ідэалам Святой Сям’і, распаўсюджваць харызму адзінства і любові ў сваіх сем’ях і акружэнні і пастаянна падтрымліваць малітвай сясцёр назарэтанак і ўсе сем’і свету. Сёстры ў сваю чаргу моляцца за кандыдатаў і ў далейшым будуць спрыяць ім на шляху духоўнага развіцця.

Час рэкалекцый быў напоўнены малітвай і канферэнцыямі, якія правёў кс. Мікалай Ціхановіч, пробашч парафіі ў Вялікіх Эйсмантах. Быў час таксама на сямейныя забавы: гульні, танцы, размовы пры вогнішчы. Дзеці сваёй прысутнасцю і непасрэднасцю ўносілі шмат весялосці. Тыдзень прайшоў незаўважна, пакінуўшы ў душы кожнага глыбокі след, і, напэўна, сустрэча прынясе плёны ва ўзрастанні любові да Бога і бліжняга.

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме