У трэцюю нядзелю верасня адбываецца пешая пілігрымка дзяцей і моладзі Гродна і ваколіц у санктуарый Маці Божай Яснагорскай на Узгорку Надзеі ў Капцёўцы. Сёлета падарожжа пад дэвізам «З Марыяй у новы навучальны год» прайшло 16 верасня.

У пілігрымцы ўдзельнічала вельмі шмат дзяцей і моладзі разам з бацькамі і апекунамі. Да Узгорка Надзеі ў Капцёўцы крочылі таксама навучэнцы Вышэйшай духоўнай семінарыі ў Гродне са сваімі духоўнымі кіраўнікамі і настаўнікі, якія вырашылі распачаць новы працоўны год малітвай і адданнем сябе ў апеку Маці Божай.

Падчас шляху пілігрымы звярталі да Панны Марыі свае просьбы. Андрэй (8 гадоў), які падарожнічаў у Капцёўку разам з мамай, маліўся аб тым, каб у гэтым годзе ў яго палепшыліся справы з матэматыкай. Алёна (7 гадоў) сёлета пайшла ў першы клас і прасіла Марыю аб добрых аднакласніцах, з якімі зможа сябраваць і дапамагаць адна адной. Карына (10 гадоў) хоча ў гэтым годзе лепш пазнаць падчас катэхезы Езуса Хрыста і жадае, каб Ён дапамагаў ёй быць добрай дзяўчынкай дома, у школе і даваць добры прыклад сваім равеснікам. Ірэна (16 гадоў), для якой гэты навучальны год у школе апошні, ні хвіліны не думаючы прызналася, што гэты год для яе асаблівы. «Мяне чакае вялікі высілак, вельмі шмат вучобы і працы, бо я хацела б атрымаць вышэйшую адукацыю за мяжой», — сказала дзяўчына. Наталля, маці дваіх дзяцей і настаўніца беларускай мовы, адзначыла, што праца з дзецьмі прыносіць ёй вялікую радасць і што яна ўсведамляе свой удзел у працэсе навучання і выхавання будучых грамадзян нашай краіны. «Часта ўзгадваю словы Яна Паўла ІІ: „Патрабуйце ад сябе, нават калі б іншыя ад вас не патрабавалі“. Я стараюся патрабаваць найперш ад сябе, а затым ужо ад маіх падапечных на занятках. Сёння нам не хапае аўтарытэтаў, якія маглі б быць добрымі прыкладамі для дзяцей і моладзі — заўтрашняга дня і будучыні нашага народа», — падзялілася думкамі Наталля.

У Капцёўцы пілігрымаў прывітаў і акрапіў святой вадой кс. Міхал Ластоўскі, кусташ санктуарыя. Урачыстую святую Імшу з удзелам шматлікіх святароў цэлебраваў біскуп Гродзенскі Аляксандр Кашкевіч. Іерарх ахвяраваў літургію за дзяцей і моладзь Гродзенскай дыяцэзіі і падзякаваў Богу за час канікул для іх, просячы Пана таксама далей суправаджаць юных вернікаў на шляхах здабывання інтэлектуальных ведаў і мудрасці.

Гамілію прамовў а. Юзаф Макарчык OFMConv. На аснове ўрыўку з Евангелля святар адзначыў, што «заплечнік з’яўляецца для кожнага дзіцяці своеасаблівым крыжам, бо трэба падняць яго і несці шмат гадоў». Айцец Макарчык заахвоціў дзяцей і моладзь у час цяжкасцяў і праблем глядзець на крыж Хрыста. Таксама святар указаў на неабходнасць любові, дадаўшы, што «найлепшым сябрам для нас павінна быць наша родная маці, Маці Найсвяцейшая і Езус Хрыстус, наш Збаўца».

Напрыканцы Імшы біскуп Аляксандр Кашкевіч асвяціў заплечнікі і школьныя прылады, якія дзеці прынеслі з сабой у пілігрымцы. «Любіце крыж і Найсвяцейшую Маці, якая заўсёды спяшаецца вам дапамагаць дома і ў школе, — заахвоціў іерарх. — Памятайце, што кожны мае свой крыж. Без крыжа няма збаўлення, няма нават надзеі. Усе свае цяжкасці давярайце Хрысту, Ён, безумоўна, вам дапаможа».

Пасля Імшы ў «амфітэатры» адбылася прэзентацыя парафіяльных груп, якія прыбылі на сустрэчу ў Капцёўку. Прэзентацыя праходзіла ў радаснай атмасферы, было шмат спеваў і танцаў. Музычнае суправаджэнне свята падрыхтавалі навучэнцы гродзенскай семінарыі. На заканчэнне дзеці і моладзь атрымалі благаслаўленне з рук біскупа Кашкевіча на тое, каб, узмоцненыя ў веры, надзеі і хрысціянскай радасці, у новым навучальным годзе вярнуцца за школьныя парты і на катэхетычныя заняткі.

Кс. Юрый Марціновіч