Сусветныя дні моладзі (СДМ), якія пройдуць у Кракаве з 25 па 31 ліпеня,
стануць 31-мі па ліку. На прэс-канферэнцыі ў Мітрапалітальнай курыі ў
Мінску 22 сакавіка арцыбіскуп Тадэвуш Кандрусевіч адзначыў, што ў СДМ
прыме ўдзел каля трох тысяч беларусаў.
«Я ўспамінаю 1991 год, калі СДМ праходзілі ў Чэнстахове, — дадаў арцыпастыр. — Так шмат людзей тады прыйшло да веры! На сустрэчу з Папам Рымскім тады ехалі не толькі католікі, але і праваслаўныя. Маю надзею, што сустрэча моладзі з Папам у Кракаве таксама будзе мець свой плён».