Мітрапаліт Мінска-Магілёўскі арцыбіскуп Тадэвуш Кандрусевіч прыняў удзел у памятных мерапрыемствах на месцы былога лагера смерці «Трасцянец», арганізаваных 18 сакавіка Міністэрствам культуры Беларусі і Мінгарвыканкамам.
Сумесна з паслом Германіі ў Беларусі Петэрам Датмарам і іншымі членамі памятных мерапрыемстваў каталіцкі іерарх пасадзіў тры дрэвы ў памяць аб ахвярах лагера смерці.
Пасля гэтай цырымоніі ў крыпце Храма-помніка ў гонар Усіх Святых была закладзена капсула з парэшткамі загінулых і зямлёй з лагера смерці «Трасцянец», а арцыбіскуп Кандрусевіч памаліўся за загінулых у Трасцянцы.
У сваёй прамове на прыёме з нагоды памятных мерапрыемстваў Мітрапаліт падкрэсліў значэнне памяці, у тым ліку малітоўнай, аб загінулых у Трасцянцы і ў іншых падобных месцах.
Арцыпастыр звярнуў асаблівую ўвагу на адказнасць сучаснага чалавека за маральнае выхаванне моладзі.
«Мемарыяльны комплекс "Трасцянец" узводзіцца не для таго, каб варушыць мінулае, раздзіраць зарубцаваныя раны і пасыпаць іх соллю, але каб падобныя трагедыі ніколі больш не мелі месца, што вельмі актуальна ў святле многіх тэрарыстычных актаў, якія адбываюцца ў розных частках свету», — адзначыў Мітрапаліт Мінска-Магілёўскі.
У мерапрыемствах прынялі ўдзел таксама прадстаўнікі дзяржаўных органаў, Мінгарвыканкама, рэлігійных канфесій, Дортмундскага і Мінскага міжнародных адукацыйных цэнтраў, а таксама дыпламатычнага корпуса.