Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Прыміцыйная святая Імша адбылася ў Мядзелі
Беларусь - Мінска-Магілёўская архідыяцэзія
16.06.2011 13:08

12 чэрвеня 2011 г., ва ўрачыстасць Спаслання Духа Святога, у парафіі Маці Божай Шкаплернай у Мядзелі (Будслаўскі дэканат) прыміцыйную святую Імшу цэлебраваў а. Пётр Фарына OCD, кармэліт босы, выпускнік Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску. Для парафіі ў Мядзелі гэта стала вялікай радасцю, бо ўжо другі святар выйшаў з гэтай парафіяльнай супольнасці. Гэта радасць і для супольнасці кармэлітаў босых у Беларусі, шэраг якіх папоўніўся яшчэ адным святаром.

Урачыстасць распачалася прывітаннем новапрэзбітэра пробашчам парафіі а. Паўлам Леліто OCD. Затым у спецыяльна сплеценым вянку а. Пётр Фарына прыйшоў у працэсіі да роднай святыні, дзе атрымаў благаслаўленне сваіх бацькоў Антонія і Сальвіны Фарынаў на шлях святарскага служэння Божаму люду. У касцёле новапрэзбітэра прывіталі міністранты, дзеці, моладзь і дарослыя. Гамілію прамовіў а. Аркадзь Куляха OCD, дэлегат Правінцыяла ў Беларусі, духоўны айцец семінарыі ў Пінску і магістр клерыкаў кармэлітаў у Пінску. Святую Імшу ўпрыгожылі спевам і музыкай парафіяльны хор і гурт «Подых Духа» з семінарыі ў Пінску.

Ва ўрачыстасці прынялі таксама ўдзел Правінцыял Варшаўскай Правінцыі кармэлітаў босых а. Раман Хэрнога OCD, рэктар духоўнай семінарыі ў Пінску кс. доктар Ян Саламон, віцэ-рэктар семінарыі кс. Уладзімір Русак, кармэліты босыя з Польшчы і Беларусі, алюмны семінарыі з Пінска, сёстры кармэлітанкі ад Дзіцятка Езуса з Гудагая і Адамавіч (Гродзенская вобласць), свецкія выкладчыкі семінарыі, шматлікія госці і сябры а. Пятра.

Прагучала шмат цёплых словаў, але самай галоўнай была шчырая малітва за новапрэзбітэра. Яшчэ раз віншуем а. Пятра Фарына OCD са святарскім пасвячэннем і жадаем быць святым і руплівым працаўніком у Хрыстовым вінаградніку. Няхай Маці Божая Шкаплерная, апякунка кармэліцкага ордэна, ахінае яго плашчом сваёй апекі і будзе пуцяводнай зоркай у здзяйсненні Божай волі.

А. Юрый Кулай OCD
Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме