Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Вернікі з Крупак арганізавалі свята для дзяцей-сірот
Беларусь - Мінска-Магілёўская архідыяцэзія
03.01.2013 15:41

Мы ўсе добра ведаем адказ на пытанне: хто больш за ўсіх чакае свята Божага Нараджэння? Канечне ж, гэта дзеці. Менавіта іх жывыя вочкі захапляюцца маленькім Езусам у яслях, дзіўна ўпрыгожанымі ёлкамі, каляднымі падарункамі. Але становіцца вельмі сумна, калі некаторыя дзеці не могуць у поўнай меры радавацца Калядам.

Таму пробашч парафіі ў Крупках кс. Віталій Маргуноў разам з дзецьмі і моладдзю парафіі вырашылі арганізаваць сапраўднае свята для дзетак з мясцовага сацыяльнага прытулку. Калядная сустрэча мела насычаную праграму. Спачатку дзеткі мелі магчымасць стаць гледачамі цікавай тэатральнай пастаноўкі: яны з захапленнем глядзелі на юных акцёраў, якія старанна выконвалі свае ролі, спявалі і танцавалі.

Пасля спектаклю дзетак запрасілі на салодкі стол, дзе малышы разам з дарослымі дзяліліся аплаткай, выказвалі свае думкі і ўражанні наконт сустрэчы, чыталі вершы. Маленькім гасцям было вельмі прыемна атрымаць падарункі на памяць аб гэтай сустрэчы.

Усяго на свята ў парафію прыехалі сем дзетак. Самаму малодшаму ўдзельніку сустрэчы яшчэ не споўнілася тры гады. Арганізатары спадзяюцца, што іх намаганні прынеслі свае плёны: на дзіцячых тварах зіхацелі радасныя ўсмешкі. Няхай у дзетак, якіх у малым узросце сустрэлі жыццёвыя цяжкасці, застануцца добрыя ўспаміны аб гэтай сустрэчы, няхай шчырыя радасныя ўсмешкі часцей з’яўляюцца на іх поўных надзеі тварах.

Алёна Ярышкіна

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.