Нарач стала другім «кармэлітанскім пунктам» падчас наведвання папскім пасланнікам Мядзельшчыны.
Прывітаць шаноўнага госця да касцёла ў Нарачы прыйшло мноства людзей, у ліку якіх былі і прадстаўнікі мясцовай улады.
А спецыяльным падарункам для папскага пасланніка стаў адмысловы танец, падрыхтаваны дзецьмі парафіі.
Маленькія танцоры развучылі танец пад тры песні, адну з якіх – на нямецкай мове – на памяць ведаў і кардынал.
«У Аўстрыі гэту песню ведае кожнае дзіця, – адзначыў іерарх. – У ёй спяваецца пра любоў Бога: што можа быць большае, шырэйшае і вышэйшае за яе?»
Прадстаўнікі парафіі, вітаючы кардынала Крыстафа Шонбарна, адзначылі, што «хрысціяне ў Беларусі ў спакусах свету выбіраюць Хрыста», падарыўшы госцю на памяць альбом.
Віншуючы арцыбіскупа Тадэвуша Кандрусевіча з 35-годдзем святарства, прадстаўнікі парафіі прэзентавалі беларускаму іерарху і яго госцю з Аўстрыі кошык трускавак.
Выказваючы падзяку парафіянам за гасціннасць, кардынал зазначыў, што на прыкладзе нарачанскай парафіі ён адкрыў для сябе тры рэчы пра Каталіцкі Касцёл у Беларусі:
«Першае – вашы касцёлы аднаўляюцца, што сведчыць пра вялікую любоў Божага народа да Касцёла. Другое – я пабачыў шмат дзяцей у касцёле, яны ўмеюць танчынць і спяваць: Касцёл у Беларусі мае будучыню! І трэцяе – гэта вашы бабулі: кожны раз, калі я бачу пажылых людзей у святыні, маё сэрца напаўняецца радасцю».
Напрыканцы кардынал удзяліў усім прысутным папскае благаслаўленне.