Вокны памарыянскага кляштара свецяцца з самага ранку — сёстры-эўхарысткі  Наталля Арлянковіч SJE і Ганна Нізавес SJE, якія служаць у Друі, ужо на кухні. Яны рыхтуюць сняданак для дзетак і моладзі, якія  прымаюць удзел у раратняй Імшы…

 

Раратнія святыя Імшы ў парафіі Найсвяцейшай Тройцы ў Друі (Мёрскі дэканат) збіраюць на малітве вялікую колькасць вернікаў, значная частка з якіх, нягледзечы на ранні час,  — гэта дзеці і моладзь. Пасля Імшы па запрашэнні сясцёр яны прыходзяць у кляштар на ранішні пасілак, пасля  якога з новымі сіламі выпраўляюцца на вучобу ў школу.

 

Дзеці на кожную раратную Імшу прыносяць «зорачкі», якія пакідаюць потым ля алтара — нібы асвятляючы шлях да сваіх сэрцаў Езусу, які павінен прыйсці неўзабаве, і чакаючы з’яўлення галоўнай зоркі — бэтлеемскай.

 

Малітва ў гонар Панны Марыі, раратняя Імша, распачынаецца працэсіяй, у якой разам з дзецьмі ўдзельнічаюць усе прысутныя вернікі. Гэтая працэсія з’яўляецца сімвалам нашай зямной пілігрымкі да сустрэчы з Хрыстом, дзе Найсвяцейшая Панна Марыя — Ранішняя Зорка — дапамагае нам і апякуецца намі на шляху да збаўлення.