5 сакавіка 2010 г. Святы Айцец Бэнэдыкт XVI удзяліў аўдыенцыю каталіцкім бісупам Уганды ў межах візіту іерархаў ad limina Apostolorum у Ватыкан. Падчас сустрэчы Папа заклікаў святароў і свецкіх вернікаў гэтай афрыканскай краіны да супрацьстаяння спакусам матэрыялістычнай культуры індывідуалізму, якая ўсталявалася сёння ў многіх краінах свету. Таксама Пантыфік нагадаў аб важнасці шанавання сакрамэнту сужэнства ў яго адзінстве і непарыўнасці і прызнання святога права на жыццё.

Бэнэдыкт XVI заахвоціў каталіцкіх іерархаў Уганды падтрымліваць трывалы мір, пабудаваны на справядлівасці, велікадушнасці ў адносінах да патрабуючых, дыялогу і паяднанні. Святы Айцец указаў на значэнне сапраўднага экуменізму і неабходнасць агортвання апекай асобаў, найбольш падвержаных уздзеянню сект.

Папа падкрэсліў важную ролю традыцыйнай пабожнасці, якая выяўляецца найперш у пілігрымкавым руху. Бэнэдыкт XVI высока ацаніў грамадскую ініцыятыву Касцёла ва Угандзе ў сферы дапамогі бежанцам, сіротам, убогім і хворым на СНІД. Папа заахвоціў удзяліць увагу адукацыі свецкіх, якім належыць выяўляць актыўнасць у мас-медыя, палітыцы і культуры. Таксама Пантыфік нагадаў аб значэнні касцёльных рухаў і заклікаў найбольш забяспечаныя ў матэрыяльным сэнсе дыяцэзіі аказваць дапамогу іншым тэрытарыяльна-адміністратыўным адзінкам Касцёла. Акрамя гэтага, Папа адзначыў, што вернікам неабходна мець пачуццё адказнасці за сябе, сваю супольнасць і ўвесь Касцёл.

Святы Айцец заклікаў святароў Уганды «да малітвы і чуйнасці, асабліва ў адносінах да эгаістычных палітычных амбіцый, празмернай прывязанасці да сям’і або этнічнай групы», да паглыблення працы ў сферы пакліканняў і ўвагі ў распазнанні кандыдатаў да святарства.