«Вялікая евангелізацыйная праца патрабуе ўсё большай колькасці людзей, якія велікадушна адказваюць на заклік Бога і прысвячаюць сваё жыццё справе Евангелля», — падкрэсліў Святы Айцец Бэнэдыкт XVI у пасланні да ўдзельнікаў ІІ Лацінаамерыканскага кангрэсу пакліканняў. Кангрэс адбываецца з 31 студзеня па 5 лютага 2011 г. у Коста-Рыка.

Па словах Папы, «каштоўным плёнам місіянерскай дзейнасці будзе, акрамя ажыўлення хрысціянскага жыцця ўвогуле, павелічэнне пакліканняў да асаблівага пасвячэння». Як адзначаецца, «Касцёл у сваёй найглыбейшай сутнасці мае вымярэнне паклікання», часткай якога з’яўляецца само хрысціянскае жыццё.

«Вопыт вучыць, што пакліканняў шмат там, дзе існуе добрае планаванне і сталая практыка душпастырства пакліканняў», — піша Пантыфік, дадаючы, што «Бог шчодры, і такім жа шчодрым павінен быць уклад у душпастырства пакліканняў ва ўсіх партыкулярных Касцёлах».

Як адзначаюць арганізатары кангрэсу, умацаванне «культуры пакліканняў» служыць таму, каб усе ахрышчаныя рэалізавалі сваё пакліканне. Яны павінны быць вучнямі і місіянерамі Хрыста ў сённяшніх умовах Лацінскай Амерыкі і Карыбскіх астравоў. Таксама штодзённае душпастырства ў справе абуджэння пакліканняў павінна прысутнічаць у сем’ях, парафіях, каталіцкіх школах і іншых касцёльных інстытуцыях.