Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Бэнэдыкт XVI заклікае хрысціян і іўдзеяў да абароны чалавечай годнасці
Святы Айцец
12.05.2011 15:11

«Адна з найважнейшых спраў, якую мы можам рабіць разам, — гэта сведчанне аб нашым глыбокім перакананні, што кожны чалавек створаны па вобразе Бога і таму мае непарушную годнасць», — з такімі словамі звярнуўся Святы Айцец Бэнэдыкт XVI да прадстаўнікоў яўрэйскай арганізацыі «B’nai B’rith International». 12 мая 2011 г. Папа ўдзяліў гасцям аўдыенцыю.

Пантыфік нагадаў аб сустрэчы Міжнароднага каталіцка-іўдзейскага камітэту еднасці з нагоды 40-годдзя дыялога паміж католікамі і яўрэямі, якая адбывалася ў лютым гг. у Парыжы (Францыя). Як падкрэсліў Святы Айцец, вынікі гэтага дыялога трэба лічыць вялікім Божым дарам. Падчас парыжскай сустрэчы абодва бакі выказалі жаданне супрацоўнічаць перад абліччам выклікаў сённяшняга свету. Гэтае супрацоўніцтва павінна выявіцца ў супольнай барацьбе з убоствам, несправядлівасцю і парушэннем правоў чалавека. Папа дадаў, што існуе шмат магчымасцяў супрацоўніцтва хрысціян і іўдзеяў на карысць будавання лепшай будучыні і дабра чалавецтва.

Бэнэдыкт XVI адзначыў і важнасць практычнага супрацоўніцтва ў галіне дабрачыннасці. Таксама Папа нагадаў, што падчас размоваў дэлегацый Галоўнага Рабінату Ізраіля і ватыканскай Камісіі па рэлігійных кантактах з юдаізмам, якія прайшлі ў сакавіку гг. у Іерусаліме, падкрэслівалася неабходнасць сцвярджэння правільнага разумення ролі рэлігіі ў жыцці сучаснага грамадства. Гэтае разуменне павінна скарэкціраваць чыста гарызантальнае, а таму няпоўнае, бачанне чалавечай асобы і грамадства.

«Жыццё і праца ўсіх веруючых людзей павінны быць пастаянным сведчаннем трансцэндэнтнага, указаннем на нябачную рэчаіснасць і выражаць перакананне, што любячы і спачуваючы нам Провід кіруе лёсамі падзей, незалежна ад таго, наколькі цяжкім і небяспечным можа здавацца гэтае пілігрымаванне», — падкрэсліў Пантыфік, звяртаючыся да іўдзейскай дэлегацыі.

 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме