Бэнэдыкт XVI: насілле не служыць чалавецтву, а дэгуманізуе яго |
Святы Айцец |
12.03.2012 12:28 |
Падчас нядзельнай агульнай аўдыенцыі 11 сакавіка 2012 г. Святы Айцец Бэнэдыкт XVI разважаў над евангельскім фрагментам, у якім апавядаецца аб тым, як Езус выгнаў са святыні гандляроў і ўстанавіў новы культ — культ любові, новай святыні, якой з’яўляецца Ён сам. «Дадзены факт, які быў пераказаны ўсімі евангелістамі, адбыўся напярэдадні свята Пасхі і зрабіў вялікае ўражанне, як на натоўп, так і на вучняў, — адзначыў Пантыфік. — Як мы павінны разумець гэты жэст Езуса? Перш за ўсё трэба ўсведамляць, што ён не выклікаў якога-небудзь пераследу з боку ахоўнікаў парадку, бо ў ім бачылі тыповы прароцкі жэст: прарокі ў імя Бога часта выкрывалі злоўжыванні і чынілі гэта сімвалічнымі ўчынкамі. Вось чаму юдэі спыталіся ў Езуса: „Які знака пакажаш нам, што можаш гэтак рабіць?“ — бо хацелі, каб Ён прадэманстраваў, што сапраўды дзейнічае ў імя Бога». «Выгнанне гандляроў са святыні было інтэрпрэтавана ў палітыка-рэвалюцыйным сэнсе, ставячы Езуса ў адзін рад з удзельнікамі руху зелотаў. Яны былі „раўніўцамі” закону Божага і былі гатовы выкарыстоўваць насілле, каб прымусіць захоўваць яго (…). Насамрэч немагчыма тлумачыць паводзіны Езуса як гвалтоўныя: насілле супрацьлеглае Валадарству Божаму. Яно з’яўляецца прыладай антыхрыста. Насілле не служыць чалавецтву, але дэгуманізуе яго». Як адзначыў Папа, сапраўдным знакам аўтарытэту Езуса стане Яго смерць і ўваскрасенне. «З Пасхай Езус пачаў новы культ, культ любові, новай святыні, якой з’яўляецца Ён сам, Уваскрослы Хрыстус, праз якога кожны вернік можа шанаваць Бога Айца „ў духу і праўдзе“», — патлумачыў Пантыфік. Напрыканцы разважання, як паведамляе Ватыканскае радыё, Святы Айцец заклікаў прысутных быць жывым каменем духоўнай святыні. |