«Ніколі не бралася пад увагу магчымасць адмяніць папскі візіт у Ліван, а нарастаючае напружанне на Блізкім Усходзе тым больш узмацніла жаданне Бэнэдыкта XVI наведаць гэтую краіну, каб абвяшчаць мір і выказаць усім сваю глыбокую салідарнасць», — адзначыў Дзяржаўны сакратар Яго Святасці кардынал Тарчызіо Бэртонэ.

У інтэрв’ю французскай газеце «Le Figaro» найбліжэйшы супрацоўнік Святога Айца падкрэсліў, што Папа з вялікім непакоем сочыць за развіццём сітуацыі ў Сірыі. Пантыфік шматразова заклікаў да міру і еднасці сірыйскага народа і думаў аб знаходжанні дыпламатычнага вырашэння праблемы ў гэтай краіне. У той жа час калі гаворка ідзе пра візіт у Ліван, то, па словах кардынала Бэртонэ, Апостальская Сталіца атрымлівае шмат інфармацыі, што ўсе групы грамадства краіны з радасцю чакаюць прыезду Папы, і Ватыкан не клапаціўся аб нейкіх надзвычайных сродках бяспекі.

Кардынал аспрэчыў тую думку, што Апостальская Сталіца нібыта была асцярожнай у выказваннях адносна Сірыі. У самым пачатку крызісу «Папа рашуча асудзіў насілле і забойства людзей», «шмат разоў заклікаў усіх лідараў да ўстрымання ад насілля, да шляху дыялога і паяднання». Па словах іерарха, «пазіцыя Касцёла не нейтральная, а вельмі ясная: насілле вядзе толькі да яшчэ большага насілля».

Кажучы пра Апостальскую адгартацыю для Блізкага Усходу, якую Пантыфік падпіша ў Ліване 14 верасня, кардынал Бэртонэ адзначыў, што Папа не з’яўляецца палітычным каментатарам. Чаканне ад дакумента нейкай грамадска-палітычнай інтэрпрэтацыі «арабскай вясны» і канкрэтнай палітычнай праграмы паходзіць ад неразумення навучання Святога Айца. Адгартацыя будзе хутчэй пасланнем надзеі і заахвочваннем для ўсіх католікаў Блізкага Усходу ўносіць свой каштоўны ўклад у грамадскае жыццё.

(AG)