Кожны месяц Святы Айцец даручае малітвам вернікаў дзве інтэнцыі: агульную і місійную. У лістападзе агульная інтэнцыя Папы наступная: «Каб біскупы, святары і ўсе слугі Евангелля давалі адважнае сведчанне вернасці ўкрыжаванаму і ўваскросламу Пану».

Аб неабходнасці вернага сведчання Евангелля Бэнэдыкт XVI казаў і 12 мая 2010 г. у Фаціме падчас нешпараў, якія цэлебраваў для святароў, законнікаў, семінарыстаў і членаў касцёльных рухаў. Пантыфік тады нагадаў, што клопатам кожнага хрысціяніна, а тым больш асобаў, якія прысвяцілі сябе служэнню Богу, павінна быць вернасць уласнаму пакліканню. «Гэта выраз паслядоўнай, сапраўднай і глыбокай любові да Хрыста Святара», — адзначыў Святы Айцец.

Па словах Папы, «жыццё ў асаблівым прысвячэнні ўзнікла для таго, каб нагадваць Божаму народу аб Евангеллі» . Святы Айцец адзначаў таксама, што праз сваю гарачую малітву, аскетызм, місійную і апостальскую дзейнасць такія людзі з’яўляюцца прадказаннем эсхаталагічнага Касцёла, які з пастаянствам і любоўю сузірае свайго Бога.

Місійная інтэнцыя Папы, аб якой паведамляе Ватыканскае радыё, — «каб Касцёл, які пілігрымуе на зямлі, быў прамяністым святлом народаў». Аб місіянерскім абавязку Касцёла Святы Айцец часта нагадваў усім ахрышчаным. Папа гаварыў аб гэтым вернікам падчас свайго апостальскага падарожжа ў Германію ў 2011 г. «Дазвольце, каб Хрыстус ззяў у вас нават і тады, калі гэта патрабуе ахвярнасці і адрачэння. Не бойцеся, што вы можаце страціць нешта. Адважна выкарыстоўвайце свае здольнасці і дары для дабра Божага Валадарства і ахвяруйце саміх сябе, як воск свечкі, каб праз вас Пан асвятляў цемру», — казаў Пантыфік вернікам.

(AG)