«На экуменічным шляху нельга спыняцца на палове дарогі», — з такімі словамі 15 лістапада звярнуўся Святы Айцец Бэнэдыкт XVI да ўдзельнікаў пленарнага пасяджэння Папскай рады спрыяння хрысціянскаму адзінству. Пасяджэнне прысвечана тэме экуменізму ў новай евангелізацыі.

Па словах Папы, якія прыводзіць Ватыканскае радыё, нельга ігнараваць крызіс веры, які закрануў усе рэгіёны планеты, а таксама патрэбу сучасных людзей у духоўнасці. «Духоўная беднасць многіх нашых сучаснікаў (...) прадстаўляе вялікі выклік для ўсіх хрысціян», — сказаў Бэнэдыкт XVI. Таму «даванне сведчання аб жывым Богу — гэта імператыў для ўсіх хрысціян, імператыў, які аб’ядноўвае, насуперак няпоўнаму касцёльнаму адзінству, якое мы ўсе зараз перажываем».

Святы Айцец заклікаў памятаць аб тым, што аб’ядноўваць хрысціян павінна вера ў Бога, Айца і Стварыцеля, які адкрыўся ў Сыне Езусе Хрысце праз Духа, які ажыўляе і асвячае. «У святле прыярытэтнага месца веры, — падкрэсліў Папа, — разумеецца і важнасць тэалагічных дыялогаў і дыскусій паміж Цэрквамі і рэлігійнымі супольнасцямі». Такія дыскусіі «дазваляюць прыняць, разам з разыходжаннямі і перашкодамі, таксама багацце вопыту, духоўнага жыцця і тэалагічных разважанняў, якія становяцца стымулам для усё больш глыбокага сведчання», «нават калі ў бліжэйшай будучыні не бачна магчымасці для ўстанаўлення поўнага адзінства».

Бэнэдыкт XVI дадаў, што адзінства хрысціян залежыць не толькі ад працы вернікаў, але і ад іх малітвы: бо адзінства — гэта дар Бога. Таму, як падкрэсліў Святы Айцец, на экуменічным шляху важна, каб Цэрквы і рэлігійныя супольнасці не спыняліся на палове дарогі. «Менавіта ў поўным адзінстве веры, сакрамэнтаў і служэння становіцца відавочнай канкрэтная сіла Бога, прысутнага і дзейснага ў свеце. Праз бачнае адзінства вучняў Езуса, адзінства па-чалавечы невытлумачальнае, стане магчымым пазнаць дзейнасць Бога, які пераўзыходзіць тэндэнцыю свету да падзелаў», — адзначыў Пантыфік.

(AG)