Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Бэнэдыкт XVI да прадстаўнікоў Папскіх акадэмій: мастацтва можа выражаць прыгажосць веры
Святы Айцец
21.11.2012 22:37

Свет мастацтва можа быць сведкам прыгажосці веры. Аб гэтым гаворыцца ў пасланні Святога Айца Бэнэдыкта XVI да ўдзельнікаў XVII пасяджэння Папскіх акадэмій, якое адбылося 21 лістапада ў Ватыкане. Сёлета яно прайшло пад назвай «Мастак, як Касцёл, сведка прыгажосці веры».

Папскае пасланне агучыў на пасяджэнні Дзяржаўны сакратар Яго Святасці кардынал Тарчызіо Бэртонэ. У пачатку дакумента Пантыфік павіншаваў кіраўніцтва і членаў нядаўна створанай Папскай акадэміі лацінскай мовы, адзначыўшы, што хацеў такім чынам зрабіць лацінскую мову больш вядомай і ўжыванай як у Касцёле, так і ў навучальных установах. Святы Айцец пажадаў акадэміі плённай дзейнасці і перадачы культурнай спадчыны новым пакаленням.

Папа нагадаў, што, адкрываючы Год веры, уручыў дакументы Другога Ватыканскага Сабору па прыкладзе Паўла VI прадстаўнікам розных сфер, у тым ліку сферы мастацтва. Гэтыя дакументы «сінтэзуюць шлях, распачаты Касцёлам ХХ стагоддзя (…), каб ажывіць дыялог са светам мастацтва, які ўсё больш аддаляецца ад гарызонту сведчання веры».

Бэнэдыкт XVI узгадаў у пасланні і пра сваю сустрэчу з прадстаўнікамі свету мастацтва ў Сікстынскай капэле ў 2009 г. Тады, звяртаючыся да іх, Папа пацвердзіў волю Касцёла да новага знаходжання радасці ў супольным разважанні і супольнай дзейнасці, каб паставіць у цэнтр увагі як касцёльнай супольнасці, так і свету культуры прыгажосць. «Прыгажосць веры ніколі не можа станавіцца перашкодай да стварэння мастацкай прыгажосці», — падкрэсліў Святы Айцец і дадаў, што сапраўдны мастак дзякуючы сваёй асаблівай эстэтычнай уражлівасці і інтуіцыі можа лепей за іншых убачыць прыгажосць веры, а затым выразіць яе сваёй мовай.

Пантыфік заклікаў адрасатаў свайго паслання ў гэты Год веры імкнуцца да таго, каб іх мастацкі шлях станавіўся «інтэгральным падарожжам», у якім былі б спалучаны ўсе вымярэнні чалавечага жыцця, каб такім чынам сведчыць аб прыгажосці веры ў Хрыста.

У сёлетнім пасяджэнні Папскіх акадэмій удзельнічаюць прадстаўнікі 7 такіх установаў, у тым ліку заснаванай нядаўна Папскай акадэміі лацінскай мовы.

(AG)

 

Пры выкарыстанні матэрыялаў сайта спасылка на Catholic.By абавязкова.