30 лістапада дэлегацыя Ватыкана на чале са старшынёй Папскай рады спрыяння хрысціянскаму адзінству кардыналам Куртам Кохам удзельнічала ў літургіі ў Стамбуле ў свята св. Апостала Андрэя. На заканчэнне набажэнства было агучана пасланне папы Бэнэдыкта XVI да Патрыярха Канстанцінопальскага Барталамея.

У пасланні Святы Айцец адзначыў, што прабыванне ватыканскай дэлегацыі на гэтым свяце ў Стамбуле і наведванне Рыма прадстаўнікамі Канстанцінопальскага Патрыярхату на ўрачыстасць свв. Пятра і Паўла — «выраз сувязяў братэрства, якія яднаюць Цэрквы». Гэта «еднасць глыбокая і рэальная, хоць і яшчэ недасканалая, якая будуецца не на чалавечых поглядах (…), а на супольнай веры ў Езуса Хрыста».

Па словах Пантыфіка, на гэтым фундаменце магчымы «шлях да вяртання поўнага адзінства». «Наш намер рухацца ў гэтым кірунку застаецца нязменным», — дадае Святы Айцец. Поўная еднасць, як падкрэсліваецца ў пасланні, — гэта «дар Бога, які можа ўчыніць невымерна больш за тое, што мы просім або разумеем».

Папа падзякаваў Патрыярху Барталамею за ўдзел у святкаванні 50-годдзя Другога Ватыканскага Сабору і адкрыцці Года веры. Яго візіт, адзначае Пантыфік, дазволіў «умацаваць сувязі любові паміж Папам і Патрыярхам».

Ватыканская дэлегацыя таксама сустрэлася ў Стамбуле з Сінадальнай камісіяй па адносінах з Каталіцкім Касцёлам, з прадстаўнікамі каталіцкай супольнасці ў гэтым горадзе і з Экуменічным камітэтам Апостальскага Вікарыяту.

(AG)