Навучанне Яна Паўла ІІ пра любоў і сужэнства разглядалі падчас сустрэчы, якая адбылася ў касцёле св. Станіслава ў Рыме 2 снежня. Удзельнікі сустрэчы, арганізаванай Аддзелам дакументацыі і вывучэння Пантыфікату Вялікага Папы і Польскім душпастырствам у Рыме, шукалі адказы на фундаментальныя жыццёвыя пытанні ў лістах і творах благаслаўлёнага.

Выкладчык Папскага Латэранскага ўніверсітэта кс. Пшэмыслаў Квяткоўскі, які праводзіў сустрэчу, адзначыў, што ў драме Караля Вайтылы «Перад лаўкай ювеліра» ўздымаецца пытанне пра сэнс жыцця і пра тое, што чалавек пакліканы да еднасці з іншым.

Матыў любові як сілы, здольнай асвятліць любую цемру, прысутнічае і ў санетах будучага Папы. Нездарма моладзь, якая збіралася вакол кс. Вайтылы, шукала праўду пра жыццё і чалавека ў сувязі з праўдай пра Бога. А дзякуючы яго духоўнай падтрымцы, маладыя вернікі маглі будаваць сем’і, здольныя евангелізаваць, сведчыць аб найвялікшай любові. На сустрэчы было распаведзена пра некаторыя такія сем’і.

Караль Вайтыла суправаджаў моладзь на яе шляху да любові, якая з’яўляецца пераадоленнем эгаізму і ахвяраваннем сябе іншаму. Вялікую ўвагу ён надаваў духоўнасці шлюбу, пры якой на першым месцы стаіць любоў да Хрыста, з якой злучана любоў да сужэнца. Такія думкі прагучалі на сустрэчы.  

(AG)