З прычыны голаду і беднасці ў свеце пакутуюць больш за 650 мільёнаў жанчын, — паведамляюць каталіцкія арганізацыі ў Іспаніі. Міжнародны дзень жанчын стаў нагодай,  каб заклікаць да прававой роўнасці жанчын, іх доступу да адукацыі і аховы здароўя.

Aрганізацыя «Manos Unidas» звяртае ўвагу на грамадскую няроўнасць, ахвярамі якой становяцца жанчыны ва ўсім свеце, асабліва ў менш развітых краінах. Як адзначае арганізацыя, наступіла «фемінізацыя беднасці»: з 1 мільярда 300 мільёнаў усіх, хто жыве ў крайняй беднасці, жанчыны складаюць больш за палову. Яны адчуваюць недахоп медыцынскай апекі, асабліва падчас цяжарнасці, становяцца ахвярамі сексуальнага насілля і гандлю людзьмі, не маюць лёгкага доступу да рынку працы і справядлівага ўзнагароджвання.

Каталіцкая Канфедэрацыя CONCAPA заклікае іспанскае грамадства да захавання роўнасці правоў для жанчын. Таксама арганізацыя заахвочвае дапамагчы жанчынам пагадзіць працу з сям’ёй і мацярынствам.

(AG)