Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Хрысціяне Святой Зямлі спадзяюцца на дапамогу Папы ва ўсталяванні міру
16.04.2013 11:29

Папа Францішак, хоць і не бываў на Святой Зямлі, добра ведае сітуацыю хрысціянскай дыяспары з Блізкага Усходу, — адзначыў Патрыярх Ерузалема арцыбіскуп Фуад Туаль. Іерарх нагадаў, што ў бытнасць кардыналам сённяшні Пантыфік атачаў вялікім клопатам блізкаўсходніх хрысціян у Буэнас-Айрэсе.

Арцыбіскуп Туаль пазнаёміўся з будучым Пантыфікам, калі два гады таму наведваў палесцінскую дыяспару ў Аргенціне. Іерарх спадзяецца, што Папа пажадае наведаць Святую Зямлю, падобна як і яго папярэднікі. Акрамя гэтага, дадае Патрыярх, новаабраны Пантыфік вядомы як «Папа бедных», а на Блізкім Усходзе, асабліва ў Сірыі, сёння многія людзі пакутуюць ад беднасці.

«Мы маем надзею, што Папа ўнясе істотны ўклад ва ўсталяванне міру і справядлівасці на Святой Зямлі, — адзначыў вікарый для вернікаў яўрэйскай мовы кс. Давід Нойхаўз. — Гэта неабходна для хрысціян у гэтым рэгіёне».

«Наша еднасць як яўрэяў і арабаў з’яўляецца нашым сведчаннем міру і справядлівасці», — дадаў вікарый Ерузалема, словы якога прыводзіць польская рэдакцыя Ватыканскага радыё.

(AG)

 

Пры выкарыстанні матэрыялаў сайта спасылка на Catholic.By абавязкова.