Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Гамілія Апостальскага Нунцыя арцыбіскупа Клаўдыё Гуджэроцці падчас Імшы на пачатак Пантыфікату папы Францішка

16 красавіка 2013 г., мінскі архікатэдральны касцёл

Вашы Эксцэленцыі — каталіцкія біскупы і ардынарыі Беларусі, паважаныя прадстаўнікі дзяржаўных уладаў, шаноўныя рэпрэзентанты дыпламатычнага корпуса, дастойныя прадстаўнікі хрысціянскіх канфесій і іншых рэлігій, дарагія браты ў святарстве і манастве, дарагія браты і сёстры ў Хрысце, шаноўнае спадарства.

Дзякую за тое, што вы прынялі запрашэнне Апостальскай Нунцыятуры ў Беларусі. Сёння мы сабраліся, каб узнесці свае малітвы да Бога за нашага Папу. Касцёл – гэта Хрыстова Цела, і Бог ніколі не забываецца пра сваё жывое цела.

Мы молімся за новага Біскупа Рыма, і ў той самы час молімся за сябе. Згодна з даручэннем, якое было дадзена Апосталу Пятру, місія Папы заключаецца менавіта ў тым, каб ён узмацняў веру сваіх братоў і сясцёр. Ён, згодна са старажытным тытулам, ёсць «Слуга Слугаў Божых». Мы молімся за яго і ў гэтым молімся за сябе.

Цікаўнасць людзей не ведае межаў. Мы прачыталі бясконцую колькасць старонак з водгукамі, высновамі і прагнозамі адносна новага Папы. Але ўсё гэта хутка скончыцца. Цікаўнасць не трывае больш, чым некалькі дзён. Свет цікавіцца Касцёлам так доўга, як доўга той выклікае сенсацыю. У гэты момант мы назіраем панаванне жэстаў, выказванняў, слоў. Незадоўга да гэтага мы бачылі панаванне бруду, якім палівалі Касцёл, каб паказаць, наколькі нягодным ён ёсць: скандалы любой катэгорыі, ці то сапраўдныя, ці выдуманыя, якія былі данінай якую трэба заплаціць усемагутным масс-медыям.

Людзі хочуць знакаў, а дакладней: хлеба. Гэта дазволіць ім менш працаваць. Калі хлеб зваліцца з неба, знікае патрэба яго выпякаць. Бог становіцца выгадным чарадзеем, і мы можам перамагчы спаборніцтва з іншымі багамі, дэманструючы, што наш Бог мацнейшы і больш выгадны.

Але Езус расчараваў людзей, якія прасілі хлеба: «Я ёсць Хлеб жыцця». Той, хто спажывае Мяне, не будзе галодны ніколі. Але Я тут, каб наталіць прагненне праўды, справядлівасці і любові, а не каб прапанаваць мяккі і пахучы бохан хлеба.

Францішак, як і ўсе папярэднія Папы, ужо падкрэсліў, што толькі гэта таямнічая, асабістая, гарачая камунія з асобай Езуса Хрыста ёсць збаўленнем свету. Усе рухі, прамовы, надзеі і чаканні маюць імя: Езус Хрыстус і нашае жыццё ў Ім. Усё астатняе — гэта пыл, які будзе развеяны ветрам.

Езус — гэта хлеб жыцця. І тут, у Эўхарыстыі, разумеем, што гэты хлеб – гэта паламаны хлеб. Таму што жыццё Езуса было паламанае. Паламанае смерцю. Паламанае Яго ўласным жэстам, калі Ён ламаў хлеб уласнага цела і падаваў сваім вучням на Апошняй Вячэры. Хлеб павінен прайсці праз смерць, каб стаць хлебам жыцця. «Калі пшанічнае зерне, упаўшы ў зямлю, не памрэ, дык застанецца адно; а калі памрэ, дык прынясе багаты плён» (Ян 12, 24).

Гэта здарылася са Стэфанам. Ён раздаваў хлеб жыцця, маючы удзел у смерці свайго Пана.

Дзякуем Пану за тое, што даў нам папу Францішка. Зараз мы молім Бога за той час, калі папа Францішак, так, як і ўсе хрысціяне, сутыкнецца з мучаніцтвам цярплівасці. З мучаніцтвам самотнасці, незразумення, быць можа, непрыняцця. Просім, каб у гэтай пакуце, кожны раз, калі Папа ламае Эўхарыстычны хлеб, Бог дазволіў яму адчуваць, што ягонае паламанае жыццё — гэта тое самае жыццё жывога хлеба, ягонага і нашага Пана Езуса Хрыста.

Папа сам падкрэсліў таямніцу крыжа, калі сказаў: «Калі мы крочым без крыжа, калі будуем без крыжа, калі вызнаём Хрыста без крыжа, мы не вучні Пана — мы вучні гэтага свету: мы можам быць біскупамі, святарамі, кардыналамі, Папамі, але не вучнямі Пана» (Гамілія падчас Імшы з удзелам кардыналаў-выбаршчыкаў у Сікстынскай капэле).

Для хрысціян, і быць можа, для ўсіх мужчын і жанчын добрай волі, смерць і ўваскрасенне – гэта два бакі той самай манеты. І калі ўсе спяваюць «Гасанна», яны зазвычай ужо падрыхтавалі мячы, каб забіць таго, каго ў гэты момант узвялічваюць.

Бывае і наадварот. Прачытаем апошні радок чытання з кнігі Дзеяў Апосталаў: «А Саўл быў згодны з ягоным забойствам».

Саўл быў ганіцелем а Стэфан ахвярай. Ізноў таямніца Касцёла. З гэтай крыві Бог збіраеца стварыць новую асобу. Саўл стане Паўлам, Апосталам паганаў, адданым, нястрыманым сведкам свайго Пана. Ён памрэ такім самым чынам, як Стэфан. У Рыме, горадзе, новым біскупам якога і ёсць папа Францішак.

Божа, благаславі папу Францішка, Касцёл і род людскі, і дазволь, каб хлеб, паламаны за многіх, быў заўсёды хлебам новага і вечнага жыцця. Няхай крыж будзе дрэвам жыцця. Амэн.

Адноўлена 17.04.2013 01:01
 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме

Гаміліі

05.07 09:13Гамілія Мітрапаліта Кандрусевіча падчас св. Імшы ў Тракелях
01.07 11:55Гамілія Мітрапаліта Кандрусевіча падчас св. Імшы ў Будславе
26.06 11:53Гамілія Мітрапаліта Кандрусевіча падчас св. Імшы на распачацце пілігрымкі з Мінска ў Будслаў
21.06 11:59Гамілія Мітрапаліта Кандрусевіча на Імшы для ўдзельнікаў Парафіяды Гродзенскай дыяцэзіі
15.06 12:02Гамілія Мітрапаліта Кандрусевіча да 25-годдзя адраджэння парафіі ў Слуцку
04.06 15:47Гамілія Мітрапаліта Кандрусевіча ва ўрачыстасць Спаслання Духа Святога
27.05 09:06Гамілія Мітрапаліта Кандрусевіча на св. Імшы перад працэсіяй Божага Цела ў Мінску
21.05 19:31Гамілія Мітрапаліта Кандрусевіча падчас св. Імшы з нагоды сярэбранага юбілею манаскіх абяцанняў біскупа Аляксандра Яшэўскага SDB
21.05 12:00Гамілія Мітрапаліта Кандрусевіча падчас св. Імшы з удзелам дзяцей да Першай Камуніі ў мінскай архікатэдры
20.05 14:19Гамілія біскупа Антонія Дзям’янкі падчас св. Імшы з нагоды 360-й гадавіны пакутніцкай смерці св. Андрэя Баболі