Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
28 снежня — свята святых Немаўлят
ПЕРШАЕ ЧЫТАННЕ
1 Ян 1, 5 — 2, 2

Кроў Езуса ачышчае нас ад усялякага граху

Чытанне Першага паслання святога апостала Яна.

Умілаваныя:

Навіну, якую мы пачулі ад Езуса Хрыста, абвяшчаем вам, што Бог ёсць Святло і няма ў Ім ніякай цемры. Калі мы кажам, што маем еднасць з Ім, а ходзім у цемры, то мы хлусім і паступаем не па праўдзе. А калі ходзім у святле, як Ён ёсць у святле, то маем еднасць паміж сабою, і кроў Езуса, Сына Ягонага, ачышчае нас ад усялякага граху. Калі кажам, што не маем граху, ашукваем саміх сябе, і няма ў нас праўды. Калі ж вызнаём грахі нашыя, то Ён, верны і справядлівы, прабачыць нам грахі і ачысціць нас ад усялякай несправядлівасці. Калі кажам, што мы не зграшылі, то робім Яго ілгуном, і няма ў нас слова Ягонага.

Дзеці мае, гэта пішу вам, каб вы не грашылі. Калі ж хто зграшыць, то мы маем Заступніка перад Айцом, Езуса Хрыста справядлівага. Ён ёсць ахвярай уміласціўлення за нашыя грахі, і не толькі за нашыя, але таксама за грахі ўсяго свету.

Гэта слова Божае.

аРЭСПАНСАРЫЙНЫ ПСАЛЬМ

           Пс 124 (123), 2–3, 4–5. 7ab–8 (Р.: пар. 8)

Рэфрэн: Наша дапамога — у імені Пана.

2. Калі б Пан не быў з намі, *
і людзі супраць нас паўсталі,
3. то яны праглынулі б нас жывымі, *
калі б распаліўся іх гнеў супраць нас.

Рэфрэн:

4. Тады б залілі нас воды, *
паток прайшоў бы над намі,
5. Тады прайшлі б над намі, *
бурлівыя воды.

Рэфрэн:

7. Душа наша, як птушка, вызвалілася з сіла лоўчых; *
сіло парвана, і мы ўратаваліся.
8. Дапамога наша — у імені Пана, *
які стварыў неба і зямлю.

Рэфрэна СПЕЎ ПЕРАД ЕВАНГЕЛЛЕМ


Акламацыя: Аллелюя, аллелюя, аллелюя.

Цябе, Божа, праслаўляем; вызнаём Цябе, Пане, *
слаўны хор апосталаў Цябе ўсхваляе.

Акламацыя: Аллелюя, аллелюя, аллелюя.
аЕВАНГЕЛЛЕ
Мц 2, 13–18

Ірад паслаў пазабіваць усіх хлопцаў у Бэтлееме

+ Чытанне святога Евангелля паводле Мацвея.

Калі мудрацы адышлі, вось, анёл Пана з’явіўся Юзафу ў сне і сказаў: Устань, вазьмі Дзіця і Маці Яго, і ўцякай у Егіпет і будзь там, пакуль не скажу табе; бо Ірад будзе шукаць Дзіця, каб загубіць Яго. Ён устаў, узяў Дзіця і Маці Яго ноччу і пайшоў у Егіпет. І быў там да смерці Ірада. Так збылося сказанае Панам праз прарока: З Егіпта паклікаў Я Сына Майго.

Тады Ірад, убачыўшы, што мудрацы ашукалі яго, вельмі разгневаўся і паслаў пазабіваць усіх хлопцаў у Бэтлееме і ва ўсіх ваколіцах яго, ад двух гадоў і менш, паводле часу, які выведаў ад мудрацоў. Тады збылося сказанае прарокам Ераміяй, які кажа: Голас у Раме чутны, плач і лямант вялікі. Рахіль аплаквае дзяцей сваіх і не хоча суцешыцца, бо іх няма.

Гэта слова Пана.



Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Адноўлена 25.01.2010 18:34
 

Пры выкарыстанні матэрыялаў сайта спасылка на Catholic.By абавязкова.