Чацвер — трэці звычайны тыдзень | Друк |
Год І

ПЕРШАЕ ЧЫТАННЕ

Гбp 10, 19–25

У паўнаце веры будзем трымацца вызнання надзеі, будзем зважаць адзін на аднаго, каб заахвочваць да любові

Чытанне Паслання да Гaбрэяў.

Браты:

Маючы адвагу ўвайсці праз Кроў Езуса ў Святое Месца новым і жывым шляхам, які Ён адкрыў нам праз заслону, гэта значыць, праз Цела сваё; маючы вялікага святара над Божым домам, наблізімся са шчырым сэрцам і ў паўнаце веры, акрапіўшы сэрцы ад нячыстага сумлення і абмыўшы целы чыстаю вадою.      

Будзем непахісна трымацца вызнання надзеі, бо верны той, хто абяцаў. І будзем зважаць адзін на аднаго, каб заахвочваць да любові і добрых учынкаў. І не пакідайма нашага сходу, як стала звычаем некаторых, але будзем заахвочваць адзін аднаго; і тым больш, чым больш бачыце, як набліжаецца гэты дзень.

Гэта слова Божае.

аРЭСПАНСАРЫЙНЫ ПСАЛЬМ

            Пс 24 (23), 1–2. 3–4аb. 5–6  (Р.: 6)

Рэфрэн: Гэта народ верны, які шукае Пана.

1. Пану належыць зямля і ўсё, што на ёй,*
сусвет і ўсё, што жыве ў ім.
2. Бо Ён заснаваў яго на морах *
і на рэках умацаваў яго.

Рэфрэн:

3. Хто ўзыдзе на гару Пана, *
і хто стане на святым месцы Ягоным?
4. Той, у каго рукі бязвінныя і чыстае сэрца, *
хто не схіляў душы да марнасці.

Рэфрэн:

5. Ён атрымае благаслаўленне ад Пана *
і ўзнагароду ад Бога, свайго Збаўцы.
6. Вось пакаленне тых, хто Яго шукае, *
хто шукае абліччаТвайго, Бог Якуба.

Рэфрэн:
а

Год ІІ

ПЕРШАЕ ЧЫТАННЕ

2 Сам 7, 18–19. 24–29

Хто я, Пане Божа, і які дом мой

Чытанне Другой кнігі Самуэля.

Пасля таго, як Натан прамовіў да Давіда, увайшоў кароль Давід, сеў перад абліччам Пана і сказаў: Хто я, Пане Божа, і які дом мой, што Ты прывёў мяне аж сюды? І гэта яшчэ здалося малым ў вачах Тваіх, Пане Божа, і Ты сказаў пра дом слугі Твайго на будучае. Гэта паводле закону чалавека, Пане Божа.

Ты ўмацаваў сабе народ Твой, Ізраэль, свой народ навекі, і Ты, Пане, стаў яго Богам. І цяпер, Пане Божа, умацуй навекі слова, якое Ты сказаў пра слугу свайго і яго дом, і зрабі, як Ты казаў. Тады ўзвялічыцца навекі імя Тваё, і скажуць: Пан Магуццяў ёсць Богам Ізраэля. Дом слугі Твайго, Давіда, будзе непахісна трываць перад Табою. Бо гэта Ты, Пане Магуццяў, Божа Ізраэля, аб’явіў свайму слузе, кажучы: Збудую табе дом. Таму слуга Твой знайшоў у сэрцы адвагу маліцца да Цябе такою малітваю. Вось жа, Пане мой Божа, Ты – Бог, і словы Твае – праўда. Ты паабяцаў гэтае дабро слузе Твайму.

Будзь ласкавы благаславіць дом слугі свайго, каб ён быў навекі перад Табою, бо Ты, Пане Божа, сказаў гэта, і Тваім благаслаўленнем благаслаўлёны будзе дом слугі Твайго навекі.

Гэта слова Божае.

аРЭСПАНСАРЫЙНЫ ПСАЛЬМ

            Пс 132 (131), 1–2. 3–5. 11. 12. 13–14  (Р.: пар. Лк 1, 32b)

Рэфрэн: Дасць Яму Пан Бог трон айца Давіда.

1. Успомні, Пане, Давіда *
і ўсе яго цярпенні.
2. Як ён Пану кляўся, *
даваў прысягу Усемагутнаму Богу Якуба.

Рэфрэн:

3. Не ўвайду ў шацёр свайго дому, †
не ўзыду на ложа пасцелі сваёй, *
4. не дам заснуць сваім вачам і павекам маім задрамаць,
5. пакуль не знайду месца для Пана, *
шатра для Усемагутнага Бога Якуба.

Рэфрэн: 

11. Прысягаў Пан Давіду ў вернасці, *
і не адступіць ад яе:
Народжанае ад цябе патомства *
пасаджу на троне тваім.

Рэфрэн: 

12. Калі сыны твае будуць захоўваць Мой запавет *
і Мае сведчанні, якім навучу іх,
то іхнія сыны вечна будуць сядзець *
на троне тваім.

Рэфрэн: 

13. Пан выбраў Сіён, *
упадабаў яго сабе як жыллё.
14. Гэта месца Майго адпачынку навекі, *
тут пасялюся, бо ўпадабаў яго.

Рэфрэн:

а

СПЕЎ ПЕРАД ЕВАНГЕЛЛЕМ

Пс 119 (118), 105
Акламацыя: Аллелюя, аллелюя, аллелюя.

Слова Тваё – светач для маёй нагі
і святло для маёй сцежкі.

Акламацыя: Аллелюя, аллелюя, аллелюя.
аЕВАНГЕЛЛЕ
Мк 4, 21–25

Для таго прыносіцца светач, каб паставіць яго на падсвечніку. Якой мераю мераеце, такой і вам будзе адмерана

+ Чытанне святога Евангелля паводле Марка.

У той час:

Езус сказаў народу: Ці для таго прыносіцца светач, каб паставіць яго пад кош або пад ложак? Ці ўсё ж для таго, каб паставіць яго на падсвечніку? Бо няма нічога схаванага, што б не адкрылася, і няма нічога таемнага, што б не выявілася. Хто мае вушы, каб слухаць, няхай слухае.

І сказаў ім: Зважайце на тое, што чуеце. Якой мераю мераеце, такой і вам будзе адмерана, і яшчэ дададзена. Бо хто мае, таму дадзена будзе, а хто не мае, у таго адымецца і тое, што мае.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Адноўлена 21.01.2010 11:53
 
© 2003-2024 Catholic.by