Чацвер — восьмы звычайны тыдзень | Друк |
Год І

ПЕРШАЕ ЧЫТАННЕ

Сір 42, 15–25

Слава Пана напаўняе ўсе Ягоныя справы

Чытанне кнігі Мудрасці Сіраха.

Я буду ўспамінаць пра справы Пана
і расказваць пра тое, што ўбачыў.
У словах Пана — Ягоныя  справы.
Сонца, якое свеціць, глядзіць на ўсё,
і слава Пана напаўняе ўсе Ягоныя справы.
Нават сваіх святых не ўпаўнаважыў Пан
расказаць пра ўсе свае цуды,
якія ўстанавіў Усемагутны Пан,
каб усё моцна трымалася ў Ягонай славе.
Ён даследаваў бездань і сэрца,
і распазнаў іх хітрыкі,
бо Найвышэйшы валодае ўсімі ведамі
і бачыць знакі часу.
Ён абвяшчае тое, што мінула і што будзе,
і адкрывае сляды таемных рэчаў.
Не абміне яго ніякая думка,
ад Яго не схаваецца ніводнае слова.
Ён уладкаваў вялікія справы мудрасці сваёй,
бо Ён існуе спрадвеку і навекі.
Яго не дапоўнілі і не аднялі ў Яго,
Ён не мае патрэбы ні ў якім дарадцы.
Наколькі пажаданыя ўсе Яго справы,
хоць іскрай ёсць тое, што мы бачым.
Усё гэта жыве і трывае навекі,
у кожнай патрэбе ўсё падпарадкавана Яму.
Усё падвойнае, адно насупраць другога,
і няма ніякага недахопу.
Адно ўмацоўвае дабро другога,
і хто насыціцца, гледзячы на славу Ягоную?

Гэта слова Божае.

аРЭСПАНСАРЫЙНЫ ПСАЛЬМ

         Пс 33 (32), 2–3. 4–5. 6–7. 8–9 (Р.: 6а)

Рэфрэн: Словам Пана створаны нябёсы.

2. Слаўце Пана на гуслях, *
грайце Яму на дзесяціструннай арфе.
3. Спявайце Яму новую песню, *
прыгожа грайце Яму і гучна.

Рэфрэн:

4. Праўдзівае слова Пана, *
і ўсе ўчынкі Ягоныя верныя.
5. Ён любіць справядлівасць і правасуддзе, *
міласцю Пана поўніцца зямля.

Рэфрэн:

6. Словам Пана створаны нябёсы, *
дыханнем Яго вуснаў — уся іхняя моц.
7. Ён воды марскія збірае, быццам у мех, *
бездані складвае ў сховах.

Рэфрэн:

8. Няхай баіцца Пана ўся зямля, *
няхай дрыжаць перад Ім усе жыхары свету.
9. Бо Ён прамовіў — і сталася, *
Ён загадаў — і з’явілася.

Рэфрэн:
а

Год ІІ

ПЕРШАЕ ЧЫТАННЕ

1 П 2, 2–5. 9–12

Вы — каралеўскае святарства, народ святы, каб абвяшчаць цноты таго, хто паклікаў вас

Чытанне Першага паслання святога апостала Пятра.

Умілаваныя:

Як нованароджаныя немаўляты, жадайце чыстага малака слова, каб праз яго ўзрастаць для збаўлення, калі вы пакаштавалі дабрыні Пана.

Прыступаючы да Пана, жывога каменя, адкінутага людзьмі, але выбранага Богам, каштоўнага, і вы самі, як жывыя камяні, будуйцеся ў дом духоўны, святарства святое, каб прыносіць духоўныя ахвяры, прыемныя Богу праз Езуса Хрыста.

Вы ж — выбраны род, каралеўскае святарства, народ святы, люд, узяты Богам ва ўласнасць, каб абвяшчаць цноты таго, хто паклікаў вас з цемры ў цудоўнае святло сваё; калісьці не народ, а цяпер народ Божы; калісьці вы не былі памілаваныя, а цяпер памілаваныя.

Умілаваныя, я заклікаю вас як чужынцаў і вандроўнікаў устрымлівацца ад цялесных пажадлівасцяў, што ваююць супраць душы. Сярод язычнікаў паводзьце сябе добра, каб, нягледзячы на тое, што абгаворваюць вас як злачынцаў, яны ўбачылі добрыя ўчынкі вашыя і праславілі Бога ў дзень наведзін.

Гэта слова Божае.

аРЭСПАНСАРЫЙНЫ ПСАЛЬМ

         Пс 100 (99), 2. 3. 4. 5  (Р.: 2с)

Рэфрэн: Станьце перад абліччам Пана з радасным спевам.

2. Усклікай Пану, уся зямля, *
з радасцю служыце Пану.
Станьце перад Яго абліччам *
з радасным спевам.

Рэфрэн:

3. Ведайце, што Пан ёсць Богам, *
Ён стварыў нас, і мы Ягоныя.
Мы Яго народ *
і авечкі Ягонай паствы.

Рэфрэн:

4. Уваходзьце ў брамы Яго з падзякаю, †
на дзядзінцы Ягоныя з пахвалою, *
праслаўляйце і благаслаўляйце Яго імя.

Рэфрэн:

5. Бо Пан ёсць добры, *
навекі Ягоная міласэрнасць,
і вернасць Яго *
з пакалення ў пакаленне.

Рэфрэн:

а

СПЕЎ ПЕРАД ЕВАНГЕЛЛЕМ

Ян 8, 12
Акламацыя: Аллелюя, аллелюя, аллелюя.

Я — святло свету, — кажа Пан, —
хто пойдзе за Мною, будзе мець святло жыцця.

Акламацыя: Аллелюя, аллелюя, аллелюя.
аЕВАНГЕЛЛЕ
Мк 10, 46–52

Настаўнік, каб я зноў бачыў

+ Чытанне святога Евангелля паводле Марка.

У той час:

Калі Езус выходзіў з Ерыхона са сваімі вучнямі і з вялікім натоўпам, Бартымэй, сын Тымэя, сляпы жабрак, сядзеў каля дарогі.

Пачуўшы, што гэта Езус Назаранін, ён пачаў крычаць: Езусе, Сыне Давіда, змілуйся нада мною. Многія загадвалі яму замоўкнуць, але ён яшчэ мацней крычаў: Сыне Давіда, змілуйся нада мною.

Езус спыніўся і сказаў: Паклічце яго. І паклікалі сляпога, кажучы яму: Смялей, уставай, Ён кліча цябе. Скінуўшы плашч, той падскочыў і падышоў да Езуса.

І адказваючы яму, Езус сказаў: Што хочаш, каб Я зрабіў табе? Сляпы сказаў Яму: Настаўнік, каб я зноў бачыў. Езус сказаў яму: Ідзі, вера твая вылечыла цябе. І той адразу пачаў бачыць, і пайшоў за Езусам па дарозе.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Адноўлена 21.05.2010 17:21
 
© 2003-2024 Catholic.by