19-20 мая ў Міждыяцэзіяльнай вышэйшай духоўнай семінарыі імя святога Тамаша Аквінскага ў Пінску знаходзіўся з візітам сакратар Кангрэгацыі па справах Духавенства арцыбіскуп Хорхэ Карлас Патрон Вонг. Іерарх наведаў гэтую навучальную ўстанову ў межах апостальскай візітацыі беларускіх каталіцкіх семінарый, каб пазнаёміцца з фармацыйным працэсам у іх.

У праграме візітацыі былі прадугледжаны сустрэчы з семінарыстамі, фарматарамі і выкладчыкамі. Таксама арцыбіскуп Хорхэ Карлас Патрон Вонг узначаліў святую Імшу ў семінарыйнай капліцы, на якой прысутнічалі акрамя семінарыйнай супольнасці спаведнікі семінарыі, кансэкраваныя асобы і некаторыя выкладчыкі.

У гаміліі арцыбіскуп звярнуў увагу прысутных на тры асноўныя моманты: будаванне супольнасці на Найсвяцейшай Ахвяры Эўхарыстыі; узаемасувязь выхавацеляў і выхаванцаў семінарыі, неабходнасць вучыцца адзін ад аднаго, а таксама сапраўдная евангельская радасць.

20 мая сакратар кангрэгацыі накіраваўся з Пінска ў Гродна на сустрэчу з супольнасцю гродзенскай вышэйшай духоўнай семінарыі.

Супольнасць Міждыяцэзіяльнай вышэйшай духоўнай семінарыі выказвае ўпэўненасць, што гэты візіт, сустрэчы і гэты час дапамогуць палепшыць фармацыйны працэс у семінарыі і накіраваць тых, хто знаходзіцца на шляху да святарства, на яшчэ большае наследаванне Хрыста-Збаўцы, што неабходнa для фармавання сапраўдных святароў, якія ва ўсім будуць спаўняць Божую волю.

Андрэй Багдановіч
Фота seminaryja.by