Арцыбіскуп Клаўдыё Гуджэроцці, які завяршае служэнне Апостальскага Нунцыя ў Беларусі, падчас дзялення аплаткай з моладдзю, якая сабралася ў мінскай катэдры ў ноч з 12 на 13 снежня на адвэнтавае чуванне, апрануўся ў вышыванку.

«Гэта мой апошні жэст — апошні падарунак — знак таго, наколькі вы мне дарагія», - сказаў арцыбіскуп Клаўдыё Гуджэроцці перад тым, як апрануць нацыянальную кашулю.

Гучныя апладысменты запоўнілі ўсю прастору святыні і доўга не сціхалі.

Пасля слоў падзякі ад моладзі Мінска-Магілёўскай архідыяцэзіі сваё развітальнае слова прамовілі прадстаўнікі грэка-каталіцкай моладзі, пасля якіх заспявалі беларускую калядку “Добры вечар” у падарунак.

Пасля благаслаўлення аплатак Мітрапалітам Тадэвушам Кандрусевічам моладзь дружнай і вялікай грамадою абступіла “свайго нунцыя”, каб павіншаваць дарагога натхняльніка з надыходзячымі святамі Божага Нараджэння.

«Я ведаю, як вы любіце моладзь, а моладзь — Вас», — яшчэ на пачатку дзялення аплаткай адзначыў Мітрапаліт Тадэвуш Кандрусевіч, звяртаючыся да арцыбіскупа, і гэтыя словы цалкам пацвердзіліся.

Моладзь заўсёды адкрыта вітала арцыбіскупа Клаўдыё Гуджэроцці, які сваім словам і простай чалавечай увагай змог заваяваць маладыя сэрцы, душы і розумы.

«Я ад’язджаю, але забіраю ўсіх вас у сваім сэрцы, — запэўніў іерарх моладзь падчас развітальнай прамовы. — Я еду ў краіну, якая вас вельмі добра разумее, вельмі блізкая да вас, краіну, у якой моладзь згубіла ўсё, бо гэтая краіна згубіла мір».

Таксама арцыпастыр сказаў моладзі, што менавіта яна складае сям’ю тых, хто ахвяраваўся стаць святаром і жыць у цэлібаце:

«Вы — наша сям’я, вы — праяўленне і рэалізацыя нашага айцоўства. Калі мы згубім вас — мы згубім усё. Так жа і ваша краіна: калі яна згубіць вас — яна страціць усё».

«Паабяцайце, — папрасіў арцыбіскуп, — ніколі не пакінуць Езуса, які верны».

«Адзінае, што мы можам (рэд.: святары) даць — гэта Божая любоў. І яна з’яўляецца самым прыгожым дарам, які немагчыма купіць за грошы. Яна  як цуд.

Кожны з вас нарадзіўся з любові двух чалавек. Таму любоў настолькі моцная, што здольная даваць новае жыццё.

І вы — гэта жыццё, вы — максімальнае праяўленне жыцця», — сказаў іерарх.

Гэта пацвердзіў чарговы моцны гул апладысментаў, які перыядычна напаўняў катэдру,  падтрымліваючы слова духоўнага настаўніка.

«Вы найлепшыя кветкі, якія я ведаю, — сказаў арцыбіскуп моладзі, дадаючы: — Ніколі не забывайцеся, наколькі Езус вас любіць. Гэта фундаментальная рэч, якую вы не зможаце забыць. Вы — ганаровае месца ў Касцёле, без вас мы не ведаем, што можа здарыцца. І я вас прашу: ніколі не пакідайце Касцёл!»

Аксана Ючкавіч

Фота Аляксандры Шчыглінскай