«Кожны год ва ўсім свеце ў дарожна-транспартных здарэннях гіне 1,2 млн. чалавек, у той час як параненых налічваецца 50 млн. Каб супрацьстаяць такім праблемам, свецкія і касцёльныя структуры павінны лепш каардынаваць энергію і сродкі, прапагандуючы годнасць чалавека таксама як карыстальніка дарог», — чытаем у дакуменце «Указанні аб душпастырстве вуліцы» (2007 г.) Папскай рады пастырства эмігрантаў і падарожнікаў. Дакумент уключае таксама «дэкалог вадзіцеля» — правілы, якімі павінен кіравацца кожны вадзіцель-хрысціянін.

Вадзіцель, ты знаходзішся на дарозе не адзін. Усюды ёсць Пан Бог твой — заўсёды памятай пра гэта.

1. Не забівай.
2. Няхай дарога будзе для цябе тым, што аб’ядноўвае людзей, а не смяротнаю небяспекаю.
3. Няхай ветлівасць, карэктнасць і асцярожнасць дапамогуць табе выйсці з непрадбачаных сітуацый.
4. Аказвай міласэрнасць і ў выпадку патрэбы дапамагай бліжняму, асабліва калі ён з’яўляецца ахвярай дарожна-транспартнага здарэння.
5. Няхай аўтамабіль не будзе для цябе праяваю ўлады, панавання і нагодай для граху.
6. З любоўю пераконвай маладых і не толькі маладых вадзіцеляў не сядаць за руль, калі яны не ў стане кіраваць аўтамабілем.
7. Аказвай падтрымку сем’ям ахвяраў дарожна-транспартных здарэнняў.
8. Дапамажы ахвяры і вінаватаму ў аварыі сустрэцца ў адпаведны момант, каб яны маглі перажыць вызваленчы досвед прабачэння.
9. На дарозе аберагай слабейшага.
10. Адчувай сваю адказнасць за іншых.

  
Малітва вадзіцеля

Божа, дай мне ўпэўненую руку і зоркае вока, каб я нікому не прычыніў шкоды ў дарозе.
Даўца жыцця, не дазволь, каб я стаў прычынаю смерці альбо калецтва для тых, каму Ты даў жыццё.
Захавай, Пане, ад няшчасных выпадкаў тых, хто падарожнічае са мною.
Навучы мяне карыстацца аўтамабілем для дабра маіх бліжніх і адвядзі ад мяне спакусу празмернай хуткасці.
Учыні, каб хараство свету, створанага Табою, і радасць Тваёй ласкі заўсёды спадарожнічалі мне. Амэн.

  
Знакі на дарозе ў неба

		Затрымайся на хвіліну, куды ты так спяшаешся? Бог дае табе яшчэ шанец, можа, ужо апошні...
		Ці едзеш ты ў належным кірунку? Паглядзі ўважліва на карту, на мэту сваёй жыццёвай дарогі.
		У сваім жыцці ты часта стаіш перад такім знакам. Прасі аб святле Святога Духа.
		Асцерагайся ў сваім жыцці ўсялякіх паваротаў  «налева»! Многія такім чынам дрэнна скончылі.
		Ці не бывае часам дарога, па якой ты так спяшаешся, вельмі слізкаю? Можа, спыніся на хвіліну і правер.
		Ці добра ты разгледзеў на карце ўсе перасцярогі? Ці разумееш, што можаш апынуцца ў кювеце?
		Едзеш па дарозе з аднабаковым рухам, але ці ў добрым напрамку? Калі не, ты яшчэ можаш уратавацца, калі з’едзеш з яе.
		У Бібліі, а асабліва ў Евангеллі, ты можаш знайсці параду, што рабіць далей. А можа, святар або хто-небудзь іншы дасць табе патрэбную параду?
		Перад тым, як выехаць, паглядзі налева і направа, вазьмі пад увагу ўсе аргументы «за» і «супраць».
		Калі ты хворы — маеш цяжкі або нават лёгкі  грэх — прымі лек святой споведзі і пасля можаш ехаць у дарогу.
		У дарозе падмацоўвайся пасілкам стала Божага слова і святой Камуніі на святой Імшы. Старайся часта ўдзельнічаць у ёй.
		Хочаш шчасліва даехаць? Не забывайся і не шкадуй часу на нядзельны і святочны адпачынак.
		Знаходзішся на вельмі добрай дарозе. Можаш смела ехаць, але так, як дазваляюць правілы дарожнага руху. Толькі не засні за рулём!
		Калі знаходзішся на добрай дарозе, ніколі не збочвай. Інакш можаш не даехаць да вечнай радасці ў небе!
		Пазбягай чырвонага святла! Многія ад яго ўжо пацярпелі. Лепш дачакайся зялёнага сігналу.
		Па гэтай дарозе да неба не даедзеш — яна раптоўна абрываецца. Неадкладна зварочвай, каб не згубіць каштоўнага часу і не спазніцца.