23 студзеня ў Бярозаўцы адбылося пасяджэнне Рады па справах сям’і пры Канферэнцыі Каталіцкіх Біскупаў у Беларусі. Пасяджэнне ўзначаліў біскуп Пінскі Антоні Дзям’янка, старшыня Рады па справах сям’і.

Удзельнікі абмеркавалі наступныя справы:

1. Быў агучаны пратакол з мінулага пасяджэння, якое прайшло ў Пінску.
2. З прычыны таго, што ўрачыстасць Звеставання Пана ў гэтым годзе перанесена на 8 красавіка, «Духоўнае ўсынаўленне» пачнецца ў Касцёле ў Беларусі 7–8 красавіка. Пра «Духоўнае ўсынаўленне» гаворыцца ў лісце Канферэнцыі Каталіцкіх Біскупаў у Беларусі, які заахвочвае ўсіх да гэтай вялікай малітвы ў інтэнцыі зачатага жыцця. Ліст будзе зачытаны ў Нядзелю міласэрнасці, 7 красавіка.
3. У гэтым годзе, акрамя брашур з малітвай і тэкстам абяцання аб духоўным усынаўленні, будуць таксама надрукаваны плакаты.
4. Быў прадстаўлены актуальны стан дзейнасці Касцёла ў справе абароны жыцця ад зачацця да натуральнай смерці, у прыватнасці ў кантэксце дэбатаў наконт зменаў у закон «Аб ахове здароўя». Падчас мінулага пасяджэння Рады па справах сям’і ў Пінску быў падрыхтаваны тэкст паправак у закон. Затым ККББ пераслала гэты тэкст у Міністэрства аховы здароўя Беларусі як выказванне афіцыйнай пазіцыі Касцёла па гэтым пытанні. Разам з Беларускай Праваслаўнай Царквой Касцёл у Беларусі правёў сумесную канферэнцыю, па выніках якой быў абвешчаны тэкст рэзалюцыі, які прадстаўляе супольную пазіцыю дзвюх Цэркваў у гэтай справе. 11 студзеня пастановай Савета Міністраў РБ шэраг сацыяльных паказанняў для перарывання цяжарнасці быў скарочаны з дзесяці да дзвюх пазіцый. Важна таксама тое, што свае прапановы і заўвагі па гэтым пытанні можна выказваць на старонцы Міністэрства аховы здароўя ў інтэрнэце.
5. Было вырашана, што наступнае пасяджэнне Рады па справах сям’і адбудзецца 17 красавіка 2013 г. у Мінску.

А. Пётр Фраштэнга, сакратар Рады па справах сям’і пры ККББ