4 кастрычніка 2009 г. у вёсцы Стаўбуцева, якая належыць да парафіі Жодзішкі (Гродзенская дыяцэзія), адбыўся адпуст святога Францішка з Асізі. На ўрачыстасць сабраліся шматлікія вернікі з Мінска, Смаргоні, Жодзішак і навакольных вёсак. Святую Імшу ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч.
«Мы павіны ў сваім жыцці скіраваць позірк на гэтую зорку і з яе браць прыклад, каб адказваць на балючыя выклікі і праблемы нашага часу, каб не быць штучнымі, нядзельнымі хрысціянамі, але сапраўднымі, жывымі сведкамі Хрыста, якія не баяцца плыць супраць цячэння сучаснай секулярнай моды, якая ўсё мерыць матэрыяльным дастаткам і атрыманнем задавальнення, — падкрэсліў арцыбіскуп. — Не магчыма гарманічна развівацца без духоўных каштоўнасцяў». Мітрапаліт пажадаў вернікам з дапамогай святога Францішка заставацца вернымі свайму хрысціянскаму пакліканню і будаваць жыццё на евангельскіх каштоўнасцях.
Арцыпастыр падзякаваў спадару Францу Жылку, прадпрымальніку з Мінска, на сродкі якога была ўзведзена капліца, і павіншаваў яго з днём святога патрона.