Калядная сустрэча Душпастырства цвярозасці Гродзенскай дыяцэзіі прайшла ў Лідзе | Друк |
Беларусь - Гродзенская дыяцэзія
14.01.2013 12:03

12–13 студзеня ў Лідзе адбылася калядная сустрэча Душпастырства цвярозасці Гродзенскай дыяцэзіі. Ужо ў дзявяты раз сустрэча сабрала больш за 300 удзельнікаў не толькі з Беларусі, але і з Літвы, Латвіі, Польшчы, Расіі і Украіны.

Для падобных сустрэч не істотны нацыянальнасць або рэлігійная прыналежнасць — прысутныя становяцца адной сям’ёй з супольнай мэтай: быць сапраўды свабодным чалавекам, мець моцную волю і здольнасць разумець, што дабро, а што зло. А на гэты раз мэтай сустрэчы стала і святкаванне Божага Нараджэння.

Удзельнікі добра правялі час у размовах, забавах, імкненні дапамагчы адзін аднаму вырашыць агульныя праблемы. Вельмі важную ролю на такіх сустрэчах адыгрывае малітва, што з’яўляецца ключом і пачаткам кожнай акцыі Душпастырства цвярозасці. Таму ўдзельнікі прысутнічалі на нядзельнай Імшы ў касцёле Узвышэння Святога Крыжа ў Лідзе.

Пробашч парафіі кс. доктар Уладзімір Гулай назваў удзельнікаў Душпастырства цвярозасці сапраўдным узорам для іншых людзей, адзначыўшы, што пры моцнай волі і працы над сабой ёсць шанс выйсці з няволі алкагалізму, які нішчыць сем’і і здароўе, перарывае ўсе грамадскія сувязі, робіць жыццё бессэнсоўным і адрывае чалавека ад Бога.

Узрушальным перажываннем стала для прысутных дзяленне аплаткай — сімвалам паяднання і прабачэння, знакам сяброўства і любові, — якое выражае жаданне быць разам. Некаторыя з удзельнікаў сустрэчы дзяліліся аплаткай упершыню, і ў вачах многіх можна было заўважыць слёзы радасці.

Сёння вельмі часта мы сустракаемся з драмай залежнасці ад алкаголю, а таксама ад наркотыкаў, медыцынскіх прэпаратаў і іншых хімічных сродкаў. Вялікае няшчасце перажываюць самі залежныя, іх сужэнцы і асабліва дзеці. Іх беды ўзрушаюць многіх людзей, якія хацелі б ім дапамагчы, — але найчасцей застаюцца бяссільнымі перад гэтай знішчальнай смяротнай хваробай. Аднак існуе тое, што нясе надзею сярод роспачы, — гэта малітва, вера, што Бог можа вярнуць здароўе і падняць любога чалавека з бездані, у якую ён упаў.

Таму ўжо шмат гадоў Душпастырства цвярозасці Гродзенскай дыяцэзіі кладзе націск на малітве, плёны якой відавочныя. Мэта душпастырства — праца з тымі, хто мае алкагольную залежнасць, каб прывесці іх да цвярозасці і навучыць яе захоўваць. Душпастырства цвярозасці імкнецца да выкаранення п’янства і алкагалізму і папулярызацыі цноты цвярозасці ў народзе.

У сваёй дзейнасці ўдзельнікі душпастырства кіруюцца малітвай:

«Божа, дай мне розум і духоўную згоду прыняць тое, што не ў сілах змяніць,
Мужнасць змяніць тое, што магу,
І мудрасць адрозніць адно ад другога».

Кс. Юрый Марціновіч

(AG)

 
© 2003-2022 Catholic.by