«Gloria in Excelsis Deo» (Хвала на вышынях Богу) — гэтыя словы прагучалі ўжо ў адзінаццаты раз падчас фестывалю калядак Іўеўскага дэканата, які адбыўся 26 студзеня ў гарадскім Доме культуры. Гэты фестываль набывае ўсё большую папулярнасць і адрозніваецца ўсё лепшай падрыхтоўкай удзельнікаў.

З кожным годам дзякуючы актыўнаму ўдзелу духавенства, свецкіх катэхетаў, бацькоў і саміх дзяцей і моладзі планка фестывалю ўздымаецца ўсё вышэй. У сувязі з гэтым журы, якое ацэньвае выступленні, мае шмат клопату з выбарам пераможцаў.

Фестываль наведалі Мітрапаліт Тадэвуш Кандрусевіч і біскуп намінат Юзаф Станеўскі. У гэты дзень калядкі ў Іўі гучалі на розных мовах і ў рознай музычнай апрацоўцы. Прыгожыя ўбранні, усмешкі на тварах і ўпэўненасць на сцэне маладых удзельнікаў дадалі велічы гэтаму святу. Яно распачалося Імшой у іўеўскім парафіяльным касцёле свв. Апосталаў Пятра і Паўла, якую цэлебраваў кс. Эдмунд Друз TChr, дырэктар Пастаральнага цэнтра ККББ у Мінску. Свята аб’яданала не толькі ўдзельнікаў, але і гасцей з далёкіх старонак Беларусі.

Душа фестывалю і агеньчык, які запальвае іншых

Шматгадовым арганізатарам і натхняльнікам фестывалю з’яўляецца ксёндз Ян Гавэцкі, дэкан Іўеўскага дэканата. Як падкрэслілі самі маладыя артысты, ксёндз-дэкан — «душа і агеньчык, які запальвае любоўю да Бога і людзей». У арганізацыю гэтага свята кс.Ян Гавэцкі ўкладае сваё сэрца і шмат намаганняў. Ён мае шмат нагод, каб уручыць удзельнікам каштоўныя ўзнагароды і сувеніры, і, як сам сцвярджае, дзякуючы гэтаму фестывалю ўсе вучацца спяваць калядкі, у кожнага з вуснаў злятаюць іх словы. Праз гэты спеў працягваецца атмасфера святаў Божага Нараджэння. «Я радуюся, што ў нашым горадзе разам мы можам штосьці рабіць на Божую хвалу», — паведаміў ксёндз Ян Гавэцкі, заўважыўшы, што з кожным годам фестываль набірае ўсё большыя абароты, зала ў Доме культуры становіцца ўсё меншай для яго, удзельнікаў штораз болей, пазнаюцца новыя зоркі нашай зямлі, а фестываль ужо даўно перакрочыў межы дэканата.

На запрашэнне ксяндза дэкана прыбыў таксама гродзенскі хор «Cantate Domino», які спяваннем традыцыйных калядак у выкананні на некалькі галасоў увёў у атмасферу Божага Нараджэння. Нягледзячы на тое, што святочная актава прайшла, дзякуючы прафесійнаму выкананню калядак для прысутных стала магчыма вярнуцца да бэтлеемскага грота, каб схіліць свае калені і вызнаць: наш Пан — Хрыстус!

Праз калядкі — несці Евангелле да людзей 

На XI фестываль калядак у Іўі завітаў Мітрапаліт Мінска-Магілёўскі арцыбіскуп Тадэвуш Кандрусевіч, які, як ён сам прызнаўся, не ў першы раз з’яўляецца сведкам такога мерапрыемства. Мiтрапалiт падкрэслiў важнасць такiх фестываляў калядных песень. «Мы павiнны абвяшчаць Евангелле, i гэта мы чынім праз спеў калядак», — дадаў арцыбіскуп. Іерарх прыгадаў словы Папы Францiшка, што сучасны свет патрабуе евангельскай свежасцi. «У некаторых краiнах свету забылiся пра калядныя спевы, якiя таксама з'яўляюцца Евангеллем. Калядны фестываль — гэта вялiкая падзея, бо праз яго маладое пакаленне даносiць Евангелле да людзей. Маладыя артысты праз свой спеў дапамагаюць, каб праўда пра Евангелле была заўсёды свежай, каб святло Евангелля было ў нашым жыццi, каб чалавек не заблукаў»,— сказаў Мітрапаліт.

«Няхай праз гэты фестываль Бог народзіцца ў нашых сэрцах, каб мы былі такімі хрысціянамі, якімі хоча бачыць нас Хрыстус», — такія пажаданні пакінуў усім прысутным арцыпастыр.

Спеў калядак — дотык Бога, патрэбны беларускай зямлi 

Са сваім словам звярнуўся да прысутных біскуп намінат Юзаф Станеўскі, які ўзгадаў, што больш за дзве тысячы гадоў таму словы «Gloria in excelsis Deo» абвясцілі свету нараджэнне Езуса Хрыста, і сёння на ўсіх мовах і кантынентах таксама спяваецца «Хвала на вышынях Богу».

«Езус Хрыстус прыйшоў на зямлю, узяў нашае цела. Некаторыя называюць гэта дотыкам Бога, каб адарыць нас любоўю, каб перадаць нам радасць. Прыйшоў, каб нас адарыць жыццём, жыццём тут, на зямлі, радасным ад пазнання Яго, але таксама i жыццём вечным, — сказаў біскуп намінат. «Tаму сённяшнi канцэрт, свята вельмi радаснае, бо дзецi i моладзь з цэлага дэканата дакрануліся да кожнага з нас, перадаючы праз словы гэтых калядак радасць i любоў, якую яны атрымалi».

«Не трэба баяцца гэтага дотыку. Сёння мы бачым у фiльмах, па тэлебачаннi, што гэты дотык зменены, ён забiвае, ранiць. Дотык чалавека, якi не прыняў Бога, якi не разумее, што іншы чалавек з'яўляецца братам. Чым больш будзе такiх сустрэч, тым больш будзе гэтага лагоднага, Божага, пяшчотнага i жыццядайнага дотыка, вельмi патрэбнага на нашай любімай беларускай зямлi», — дадаў біскуп намінат.

Gloria in excelsis Deo… 

На сцэне перабыло вельмі шмат гуртоў, і складана было б зрабіць спіс пераможцаў. Уручэнню дыпломаў і ўзнагарод не было канца. На сцэну выходзілі ўдзельнікі розных узроставых катэгорый. Выступалі салісты, дуэты, трыо, квартэты, ансамблі і хоры. Усе ўдзельнікі былі ўзнагароджаны падарункамі: салодкім, цацкамі, роварамі, сувенірамі. А найбольшую сімпатыю журы ўжо не ў першы раз атрымаў ансамбль «Jutrzenka» з Іўя.
hПерадайма знак супакою…

Напрыканцы ўсе ўдзельнікі фестывалю выйшлі на сцэну, каб разам заспяваць супольны спеў пра Божае Нараджэнне «Перадайма знак супакою».

«Хоць столькі смутку ў нас, і сонны гнеў трывае, знак супакою перадайма, знак супакою дайма», — такое пасланне пакінулі маладыя артысты ўсім, хто сабраўся ў Доме культуры. Як казала Маці Тэрэза з Калькуты, Божае Нараджэнне можа святкавацца штодня, і, магчыма, гэта будзе адбывацца тады, калі наш брат, сястра будзе нам проста ўсміхацца.

Кс. Юрый Марціновіч, (AYU), (AG)