8 ліпеня сімвалы Сусветнага дня моладзі – крыж і абраз Маці Божай “Salus Populi Romani” – прыбылі ў салезіянскую парафію Святога Міхала Арханёла ў Смаргоні. Сустрэць сімвалы сабралася шмат вернікаў, асабліва моладзі.

Пасля слоў прывітання пробашча кс. Здзіслава Вэдэра SDB і ўрачыстай працэсіі вакол касцёла распачалася Імша, якую ўзначаліў кс. Антоні Грэмза, віцэ-канцлер курыі Гродзенскай дыяцэзіі.

У гаміліі святар пазнаёміў прысутных з гэтымі сімваламі любові Хрыста да чалавецтва, прыгадаўшы пра тыя Сусветныя дні моладзі, якія ўжо адбыліся, а на заканчэнне Імшы шчыра запрасіў маладых вернікаў да ўдзелу ў наступным Дні моладзі, які пройдзе ў 2016 годзе ў Кракаве (Польшча).

Пасля Імшы кожны меў магчымасць асабіста ўшанаваць рэліквіі і пераж крыжом выказаць пашану Езусу Укрыжаванаму і Маці Божай. Пад спевы вернікі развіталіся з сімваламі Сусветнага дня моладзі, якія працягваюць перэгрынацыю па Беларусі.

Паводле sdb.by

(AG)