2 жніўня 2014 г. у парафіі Св. Міхала Арханёла ў Навагрудку адбыўся “Дзень старэйшай асобы”. Група парафіянаў вырашыла дапамагчы самотным і хворым людзям, каб яны маглі паўдзельнічаць у святой Імшы.

Быў падрыхтаваны транспарт, які дазволіў людзям, якія даўно не былі ў касцёле, дабрацца туды і прыняць удзел у Эўхарыстыі. Перад Імшой кожны меў магчымасць прыступіць да сакрамэнту пакаяння.

У гаміліі пробашч парафіі кс. Аляксандр Баклажэц падкрэсліў сэнс хрысціянскага перажывання старасці і хваробы.

На знак вернасці Касцёлу і навучанню Езуса прысутныя пацалавалі крыж - сімвал збаўлення. Пасля ўсе сабраліся ў парафіяльным доме, каб паразмаўляць. Некаторыя ўжо даўно не выходзілі за межы свайго дома, таму такая сустрэча была для іх вельмі карыснай.

Таксама быў арганізаваны пачастунак і невялікі канцэрт.

Паводле grodnensis.by

(AG)