Мітрапаліт Тадэвуш Кандрусевіч адказаў крытыкам, якія лічаць, што Касцёл у Беларусі займае недастаткова актыўную грамадскую пазіцыю, мала ўдзельнічае ў фарміраванні грамадскай думкі і дыялогу па надзённых пытаннях, якія тычацца сацыяльнага навучання. Іерарх заўважыў, што «лёгка крытыкаваць, седзячы за камп’ютарам», і заклікаў крытыкаў-католікаў самім далучыцца да ініцыятыў Касцёла. «Пры сустрэчы я запытаюся ў такога чалавека: дзе ты быў, калі ў мінскай архікатэдры была Імша ў інтэнцыі абароны ненароджаных дзяцей?» — сказаў Мітрапаліт.
Такcама арцыбіскуп лічыць, што ў Беларусі неабходна фарміраваць клас палітыкаў і заканатворцаў, якія б «і ў жыцці, і ў парламенце захоўвалі сваю хрысціянскую ідэнтычнасць», «прымалі законы, базуючыся на Евангеллі і сацыяльным навучанні Касцёла, на маральных нормах, а не толькі шукаючы папулярнасці або ідучы за трэндамі, пануючымі ў свеце». Аб гэтым ішла гаворка на пасяджэнні Папскай рады «Іustitia et pax» («Справядлівасць і мір»), якое праходзіла 2–4 кастрычніка ў Рыме і было прысвечана 50-годдзю энцыклікі Яна ХХІІІ «Pacem in terris» («Мір на зямлі»). У інтэрв’ю беларускай рэдакцыі Ватыканскага радыё іерарх адзначыў, што ў Беларусі пакуль няма каталіцкай вышэйшай навучальнай установы, на базе якой магла б адбывацца адукацыя будучых пакаленняў беларускіх палітыкаў, але ў гэтым напрамку прадпрымаюцца пэўныя крокі. Так, нядаўна ў Мінску быў адкрыты Каледж тэалогіі.
Арцыбіскуп адказаў крытыкам, якія лічаць, што Каталіцкі Касцёл у Беларусі займае недастаткова актыўную грамадскую пазіцыю, мала ўдзельнічае ў фарміраванні грамадскай думкі і дыялогу па надзённых пытаннях, якія тычацца сацыяльнага навучання. Іерарх прызнаў, што крытыка мае права на існаванне і трэба заўсёды рабіць з яе высновы. «Але ці заўсёды гэтая крытыка з’яўляецца справядлівай?» — запытаў Мітрапаліт.
На думку арцыбіскупа, трэба ўважліва прыгледзецца да дзейнасці Каталіцкага Касцёла, паслухаць гаміліі святароў і біскупаў, пачытаць пастырскія пасланні, заўважыць факты. Тое, што ў Беларусі была радыкальна скарочана лічба паказанняў для правядзення аборту, — гэта, па словах іерарха, адзін з прыкладаў, які гаворыць на карысць удзелу Касцёла ў вырашэнні грамадскіх пытанняў, прычым на базе супрацоўніцтва з іншымі канфесіямі, перш за ўсё Праваслаўнай Царквой.
Мітрапаліт заўважыў, што «лёгка крытыкаваць, седзячы за камп’ютарам», і заклікаў крытыкаў-католікаў самім далучыцца да ініцыятыў, якія прадпрымае Касцёл. «Пры сустрэчы я запытаюся ў такога чалавека: дзе ты быў, калі ў мінскай архікатэдры была святая Імша ў інтэнцыі абароны ненароджаных дзяцей? — сказаў Мітрапаліт. — Ці многія з тых, хто задае падобныя пытанні і якіх я ведаю, былі на гэтай Эўхарыстыі?» «Напэўна, трэба ўдасканальвацца, мы ўсе не дасканалыя, і, напэўна, не ўсё было зроблена, але што зусім нічога не робіцца — з гэтым я не магу пагадзіцца», — адзначыў іерарх.
Арцыбіскуп лічыць, што сёння пасланне энцыклікі «Pacem in terris» актуальна не толькі для Касцёла ў Беларусі, але і для ўсяго беларускага грамадства, бо ў ёй Ян ХХІІІ нагадаў пра розныя аспекты міру. «Мір – гэта не толькі адсутнасць вайны, гэта нешта большае», — нагадаў іерарх, дадаўшы, што сёння, як ніколі, сталі актуальнымі пытанні, якія адносяцца да паняцця міру: «сацыяльная справядлівасць, любоў да бліжняга, салідарнасць, дабрачынная дзейнасць, сям’я, пераадоленне ўсялякага роду крызісаў, справядлівы падзел матэрыяльных рэсурсаў, а таксама заканадаўства».
(AG)