28 лістапада, у апошні дзень свайго прабывання ў Бірмінгеме ў межах візіту ў Вялікабрытанію, Мітрапаліт Мінска-Магілёўскі арцыбіскуп Тадэвуш Кандрусевіч наведаў па запрашэнні пачатковую каталіцкую школу.
У Вялікабрытаніі, як распавёў іерарх Catholic.by, існуюць канфесійныя школы, 90 працэнтаў кошту ўтрымання якіх аплачвае дзяржава. Такія школы павінны прытрымлівацца дзяржаўнай праграмы навучання, але маюць сваіх капеланаў і кожны клас адзін раз на тыдзень наведвае набажэнства ў малітоўным доме (або касцёле) сваёй канфесіі ці рэлігіі.
У школе, якая належыць да адной канфесіі, могуць вучыцца і прадстаўнікі іншай канфесіі, але яны абавязаны раз на тыдзень ісці з астатнімі дзецьмі на набажэнства: іх не змушаюць маліцца, але яны павінны быць разам. Аб гэтым іх бацькі ведаюць, калі пасылаюць дзяцей у такую школу, і гэта ўмова для таго, каб вучыцца там.
Каталіцкія школы ў Вялікабрытаніі, як дадаў Мітрапаліт у размове з Catholic.by, вельмі папулярныя і іх там больш, чым англіканскіх, нягледзячы на тое, што толькі 10 працэнтаў насельніцтва з’яўляюцца католікамі.
У школе, куды быў запрошаны беларускі іерарх, вучацца 230 дзяцей, ёсць таксама дзіцячы садок.
Арцыбіскуп Тадэвуш Кандрусевіч сустрэўся з дзецьмі, распавёў ім пра Беларусь і Касцёл у Беларусі, пра навучанне дзяцей рэлігіі пры парафіях. Таксама арцыпастыр пажадаў ім добрага Адвэнту і шчаслівых Калядаў. Дзеці падарылі Мітрапаліту падрыхтаваны імі сшытак з малюнкамі і пажаданнямі.
(DN), (AG)
