8–10 красавіка 2011 г. у Свіры і Засвіры (Мінска-Магілёўская архідыяцэзія, Будслаўскі дэканат) адбываліся велікапосныя парафіяльныя рэкалекцыі. Духоўныя практыкаванні правёў пробашч нясвіжскай парафіі кс. дэкан Пётр Шарко.

Рэкалекцыяніст нагадаў аб умовах добрай споведзі, распавёў пра небяспеку акультызму і розных практык, якія адводзяць чалавека ад Бога, а таксама вытлумачыў сэнс пятага касцёльнага наказу: дапамагаць у патрэбах супольнасці Касцёла.

Ставячы ў прыклад святарскую дзейнасць кс. Станіслава Кучынскага і кс. Гжэгажа Каласоўскага, якія ў савецкія часы працавалі ў Шэметаве і Нясвіжы, кс. Шарко падкрэсліў, што вельмі важна, каб парафіяне маліліся за сваіх пастыраў і аб новых святарскіх і манаскіх пакліканнях.

Ксёндз Павел Шылак, пробашч парафіі ў Крычаве, які паходзіць са Свіры, падчас рэкалекцый разам з кс. Уладзіславам Шышлам з Шэметава дапамагаў спавядаць вернікаў і наведаў з сакрамэнтальнай паслугай хворых і пажылых парафіян, якія не мелі магчымасці прыйсці ў касцёл.

Кл. Міхал Бубен