У мінскай парафіі Маці Божай Ружанцовай у Лошыцы адбыўся VІІІ дзіцяча-моладзевы фестываль мастацкай творчасці «Лошыца 2014». Імпрэза прайшла 27 красавіка, у нядзелю Божай Міласэрнасці і была прысвечана ўрачыстасці далучэння да ліку святых Яна Паўла ІІ.
Працягам малітоўнай падзякі за кананізацыю Яна Паўла ІІ — шанавальніка Божай Міласэрнасці — стаў дзіцяча-моладзевы мастацкі фестываль. Ён таксама быў прысвечаны нядзелі Божай Міласэрнасці, культ якой асабліва пашыраны ў парафіі Маці Божай Ружанцовай. У парафіяльным касцёле для штодзённай малітвы выстаўлены абраз Божай Міласэрнасці, перэгрэнацыя якога праходзіла ў парафіях Мінска-Магілёўскай архідыяцэзіі. У 15.00 штодня пры Найсвяцейшым сакрамэнце адбываецца малітва да Божай Міласэрнасці. Таксама сёлета ў парафіі паўстала новая малітоўная група да Божай Міласэрнасці. А галоўнае — неўзабаве распачынаецца будаўніцтва Нацыянальнага санктуарыя Божай Міласэрнасці.
Малітоўныя спевы, музычныя творы, вершы беларускіх паэтаў і ўласныя вершы ў выкананні дзяцей і моладзі — сталіся завяршэннем ўрачыстасці на ўшанаванне святога Яна Паўла ІІ і Божай Міласэрнасці ў парафіі Маці Божай Ружанцовай.
Галіна Абакунчык