Моладзевая місія «Чыстае сэрца» распачала ўжо традыцыйны святочны праект «Калядная ўсмешка». Для запрошаных дзяцей з розных парафій Мінска і Мінскага раёна валанцёры місіі зладзілі спектаклі і падрыхтавалі падарункі.

Парафій у Мінскім раёне шмат, таму святочныя ранішнікі праходзяць тры дні: з 28 па 30 снежня.

Першае свята было арганізавана для дзяцей з мінскіх парафій Свв. Сымона і Алены і Беззаганнага Зачацця Найсвяцейшай Панны Марыі.

Са святам дзяцей прыйшоў павіншаваць святы Мікалай.

Атмасферу свята ў гэты дзень таксама стваралі віктарына пра Божае Нараджэнне, выстаўка казачных ялінак, якія зрабілі дзеці з розных рэгіёнаў краіны, конкурсы і гульні, у якіх удзельнічалі не толькі дзеці, але і дарослыя.

Як перад пачаткам прадстаўлення, так і пасля яго дзеці наведвалі «горад майстроў», дзе ўдзельнічалі ў разнастайных майстар-класах. Зробленыя сваімі рукамі сувеніры дзеці забралі з сабой дадому.

Кожнае дзіця атрымала таксама падарунак і запрашальны білет для ўсёй сям’і на лядовае шоў, якое пройдзе 30 снежня ў «Мінск-Арэне».

Наступны ранішнік пройдзе 30 снежня ў 11.00.

Мілана Малішэўская, фота аўтара

(MV)