Мюзікл «Ксёндз Боско — айцец і настаўнік», які моладзь мінскага араторыя пры парафіі Св. Яна Хрысціцеля рыхтавала на юбілейную ўрачыстасць з нагоды 200-годдзя з дня нараджэння ксяндза Боско ў жніўні 2015 года, атрымаў другое жыццё і быў паказаны на завяршэнне кангрэсу сямейных рухаў у Маскве 15 мая.
Аўтарам сцэнарыя да мюзікла выступіў семінарыст Артур Ляшнеўскі SDB. Каб даць гледачам магчымасць зразумець сэнс прадстаўлення, моладзь пераклала мюзікл на рускую мову.
Беларуская салезіянская моладзь змагла падзяліцца сваім досведам перажывання салезіянскай харызмы, а таксама пазнаёміцца з жыццём маскоўскіх католікаў. Дзякуючы гэтай вандроўцы, як прызнаюцца самі хлопцы і дзяўчаты, яны сустрэлі сваіх старых сяброў і знайшлі шмат новых.
Паводле слоў удзельнікаў «тэатральных гастроляў», паездка ў Маскву ў чарговы раз пацвердзіла, што салезіянскае таварыства — сапраўдная сусветная сям’я, і адлегласць не з’яўляецца перашкодай для сяброўства і шчырых усмешак.