20 ліпеня ў в. Церуха Гомельскага раёна завяршыўся штогадовы Міжканфесійны творчы фестываль «Хрыстос сярод нас».Фестываль, які арганізоўвае моладзевы аддзел праваслаўнай Гомельскай епархіі, прайшоў сёлета ў чацвёрты раз. Як паведамляе сайт гомельскай каталіцкай парафіі, на свята сабраліся як праваслаўныя, так і католікі.
Адкрывала фестываль лекцыя пробашча парафіі Нараджэння Божай Маці ў Гомелі кс. Славаміра Ласкоўскага на тэму «Прыгажосць выратуе свет». Пазней на тую ж тэму праваслаўны архімандрыт Сава Мажука правёў лекцыю і зладзіў для прысутных духоўныя практыкаванні.
У перапынку для ўдзельнікаў фестывалю былі падрыхтаваны адмысловыя спартыўныя гульні, а ўвечары адбыўся канцэрт. Пасля невялікай дыскатэкі і традыцыйнага феерверка самыя таварыскія засталіся на ноч, якую правялі за вогнішчам.
(JLS)