26 сакавіка 2010 г. Святы Айцец Бэнэдыкт XVI удзяліў аўдыенцыю Прэзідэнту Гватэмалы Альвара Калому Кабальерасу. Прэзідэнт краіны сустрэўся таксама з Дзяржаўным сакратаром Яго Святасці кардыналам Тарчызіо Бэртонэ і сакратаром па сувязях з дзяржавамі пры Дзяржсакратарыяце Апостальскай Сталіцы арцыбіскупам Дамінікам Мамбэрці.

Падчас сустрэчы Прэзідэнта Гватэмалы з Папам былі адзначаны добрыя адносіны паміж Каталіцкім Касцёлам і дзяржавай у гэтай цэнтральнаамерыканскай краіне і ўнёсак, які Касцёл зрабіў у развіццё Гватэмалы. Бакі таксама абмяняліся думкамі наконт міжнароднай сітуацыі, абмеркавалі выклікі, якія стаяць перад краінай: беднасць, арганізаваная злачыннасць і эміграцыя. Падчас размоваў было падкрэслена значэнне абароны чалавечага жыцця ад моманту зачацця і вялікая роля адукацыі.

Прэзідэнт Гватэмалы ўзначальвае ўрад краіны з 2008 г.