У рамках Года веры Святы Айцец Бэнэдыкт XVI мае намер апублікаваць сваю чацвёртую энцыкліку. Аб гэтым паведаміў кардынал Дзяржсакратар Тарчызіо Бэртонэ. Як падкрэсліў іерарх, пасля разважання на тэмы любові — «Deus caritas est» і «Caritas in veritate» і надзеі — «Spe salvi» Святы Айцец жадае прысвяціць наступны дакумент тэме веры, такім чынам завяршаючы трылогію аб тэалагічных цнотах.

Як інфармуе Ватыканскае радыё, кардынал Бэртонэ прызнаўся журналістам, што Святы Айцец завяршыў рукапіс трэцяга тома кнігі «Езус з Назарэту». «Магчыма, цяпер Папа возьмецца за энцыкліку», — выказаў думку іерарх, мяркуючы, што ў энцыкліцы Пантыфік засяродзіцца над тэматыкай асаблівай важнасці веры для сучаснага чалавецтва.