На афіцыйным ватыканскім сайце змешчана новая версія гербу папы Францішка, куды ўнесены некаторыя змены ў параўнанні з першапачатковым варыянтам. Яны датычаць перш за ўсё зоркі, якая размешчана ўнізе блакітнага шчыта: яна зменена з пяціканцовай на васьміканцовую, каб такім чынам была прадстаўлена сімволіка 8 благаслаўленняў.

Акрамя таго, паведамляе Ватыканскае радыё, графічна зменена кветка нарда, што сімвалізуе святога Юзафа, апекуна Паўсюднага Касцёла. Цяпер гэты элемент больш адпавядае выгляду індыйскай расліны.

Дэвіз «Miserando atque eligendo» (Паглядзеў з міласэрнасцю і выбраў) стаў змешчаны на бела-чырвонай стужцы і выкананы іншым шрыфтам. Змены не закранулі эмблемы Ордэна езуітаў з манаграмай Хрыста.

Герб папы Францішка, які ў значнай ступені заснаваны на яго біскупскім варыянце, мае традыцыйныя папскія геральдычныя элементы: ён увенчаны біскупскай мітрай, пад якой знаходзіцца выява ключоў св. Пятра — сярэбранага і залатога.

(AG)